စစ်ကိုင်းတိုင်း၊ စစ်ကိုင်းမြို့နယ်ရှိ ရွာနန်းကျေးရွာအား အကြမ်းဖက်စစ်ကောင်စီ တပ် ဝင်ရောက်စီးနင်းမီးရှို့၍ နေအိမ် ၂၀၀ကျော် မီးလောင်ကျွမ်းပျက်စီးခဲ့ပြီး သက်ကြီးရွယ်အို တစ်ဦးနှင့် အမျိုးသားတစ်ဦးလည်း သတ်ဖြတ်သွားကြောင်း ဒေသခံများက ပြောသည်။
စစ်ကိုင်း တပ်မ(၃၃) စစ်ကောင်စီတပ်နှင့် ညောင်ငုပ်တို ပျူစောထီးအဖွဲ့ အင်အား၁၀၀ခန့်သည် သင်္ကန်းခြုံဘုန်ကြီးအယောင်ဆောင် တစ်ဦးနှင့် အမျိုးသမီးအချို့လမ်းပြမှုဖြင့် ဝက်လက်မြို့နယ် ရွာနန်းရွာကို လက်နက်ကြီးဖြင့် ပစ်ခတ်ဝင်ရောက်လာကာ ရွာကို မီးရှို့ဖျက်ဆီးခဲ့ကြောင်း၊ အကြမ်းဖက် စစ်တပ်နှင့် ပျူစောထီးအဖွဲ့က (၇၀)အရွယ် အမယ်အိုတစ်ဦး၊ (၃၂) နှစ်ခန့် အမျိုးသားတစ်ဦးကို အကြောင်းမဲ့ သတ်ဖြတ်သွားခဲ့ကြောင်း စစ်ကိုင်းမြို့နယ် သတင်းမှန်ပြန်ကြားရေးက သတင်းထုတ်ပြန်သည်။
“ကျွန်တော်တို့နေတဲ့ဘက်တစ်ခြမ်းလုံး အိမ် ၃၀၀ ကျော်လောက်ပါသွားတာ။ တောင်ဘက်က နေစပြီးလောင်တာ။ ခုချိန်ထိမီးကမငြိမ်သေးဘူး။ ဘာမှကိုမရလိုက်ဘူး။ မီးလောင်ခံရတဲ့ အဖွားက ခြေကလည်းကျိုးထားတော့ မပြေးနိုင်တာ”ဟု ဒေသခံတစ်ဦးက People’s Spring သို့ပြောသည်။
အကြမ်းဖက်စစ်တပ်နှင့် ပျူစောထီးများ၏ မီးရှို့ဖျက်ဆီးမှုကြောင့် ရွာနန်းရွာမှ အိမ်ခြေ ၂၀၀ ကျော်မီးလောင်ပျက်စီးခဲ့ကာ ကျွဲ၊နွား၊ ဝက် စသည့် အိမ်မွေးတိရစ္ဆာန် အကောင်ရေ ၁၀၀ ကျော်လည်း သေဆုံးခဲ့ကြောင်း စစ်ကိုင်းမြို့နယ် သတင်းမှန်ပြန်ကြားရေးက ထုတ်ပြန်သည်။
Public Service Announcement
ယမန်နေ့ညနေပိုင်းကလည်း စစ်ကိုင်းမြို့နယ်၊ ဆားတောင်နယ်ရှိ ညောင်ငုပ်တိုရွာတွင် စစ်ကောင်စီတပ်လက်အောက်ခံ ပျူစောထီးများနှင့် ဒေသတွင်းပြည်သူ့ကာကွယ်ရေးအဖွဲ့များ ကြား ပစ်ခတ်မှုဖြစ်ပွားခဲ့ပြီး ပျူစောထီး ငါးဦးခန့်သေဆုံးခဲ့ပြီးနောက် ယနေ့နံနက်ပိုင်းတွင် နယ်မြေချင်းနီးသည့် ရွာနန်းကျေးရွာအားအကြမ်းဖက်စစ်တပ်က ဝင်ရောက် ဖျက်ဆီးခဲ့ခြင်း ဖြစ်သည်။
