သင်္ကြန်အကြိုကာလ ပိတောက်စစ်ဆင်ရေးအနေဖြင့် နေရာသုံးခုတွင် ဖောက်ခွဲတိုက်ခိုက်မှုများပြုလုပ်ခဲ့ကြောင်း မြေအောက်ရဲဘော်မဟာမိတ်အင်အားစုက ယနေ့ သတင်းထုတ်ပြန်သည်။
ဧပြီ ၆ ရက်က သခင်မြပန်းခြံအနီးရှိ စစ်ကောင်စီထောက်တိုင် အေးနေဝင်းမိသားစုပိုင်သည့် YBS တစ်စီးကိုဖောက်ခွဲတိုက်ခိုက်ခဲ့ပြီးနောက် ဧပြီ ၈ ရက်တွင် ရန်ကုန်မြို့တော်ဝန်မဏ္ဍပ်အနီးရှိ စစ်ကားနှင့် ဘန်ကာကို ဖောက်ခွဲတိုက်ခိုက်ခဲ့ကြောင်း ထုတ်ပြန်ချက်၌ ဖော်ပြထားသည်။
ထို့ပြင် ဧပြီ ၁၁ရက်ကလည်း ဒဂုံမြို့သစ်မြောက်ပိုင်းမြို့နယ် ပင်လုံလမ်းမပေါ်၌ မိုင်းအယောင်ပြဖောက်ခွဲသောကြောင့် အကြမ်းဖက်စစ်ကောင်စီလက်အောက်ခံများရောက်ရှိလာချိန်၌ ဖောက်ခွဲတိုက်ခိုက်ခဲ့ကြောင်းအသိပေးထားသည်။
အဆိုပါစစ်ဆင်ရေးများတွင် မြေအောက်ရဲဘော်အင်အား စုအဖွဲ့သားများအားလုံးဘေးကင်းစွာဖြင့် ဆုတ်ခွာလာနိုင်ခဲ့သည်ဟု ဆိုသည်။
Public Service Announcement
ထို့ကြောင့် ပြည်သူများအနေဖြင့် သင်္ကြန်ကာလအတွင်း အကြမ်းဖက်စစ်ကောင်စီနှင့် အဝေးဆုံးနေရာများတွင်သာ လှုပ်ရှားသွားလာရန် မြေအောက်ရဲဘော်အင်အားစုက တိုက်တွန်းထားသည်။
လက်ရှိတွင် ရန်ကုန်မြို့၌ အကြမ်းဖက်စစ် ကောင်စီကို နန်းထိုက်အောင်စစ်ဆင်ရေးအပါအဝင် မြေအောက်တော်လှန်ရေးအဖွဲ့များကလည်း တိုက်ခိုက်မှုများဆက်တိုက်ပြုလုပ်နေသည်။
