ပေါက်နယ်တွင် ကျေးရွာများကို မီးရှို့ခဲ့သည့် စစ်ကောင်စီတပ်က တောထဲရှောင်ပုန်းနေသည့် ဒေသခံများ၏ ရိက္ခာများကိုပါ ထပ်မံမီးရှို့ဖျက်ဆီး

မကွေးတိုင်း ပေါက်မြို့နယ်ရှိ ကျေးရွာအများအပြားကို မီးရှို့ဖျက်ဆီးခဲ့သည့် အကြမ်းဖက်စစ်ကောင်စီတပ်သည် ရွာများကို မီးရှို့ရုံသာမက ထွက်ပြေးတိမ်းရှောင်နေသည့် ရွာသူရွာသားများ၏ စားနပ်ရိက္ခာများကိုပါ မီးရှို့ဖျက်ဆီးသွားကြောင်း ဒေသခံများက အသိပေးထားသည်။

စစ်ကောင်စီတပ်နှင့် ပျူစောထီးများသည် ဧပြီ ၇ရက်မှစ၍ ပေါက်မြို့နယ် ရှိ ကျေးရွာများကို မီးရှို့ခဲ့ရာ ရွာ ၁၃ရွာထက်မနည်းမီးရှို့ခံခဲ့ရကြောင်း ဒေသခံတို့က ပြောသည်။ ပေါက်နှင့် ဆက်စပ်နေသည့် ပခုက္ကူနှင့် ဆိပ်ဖြူနယ်ရှိ ကျေးရွာအချို့ကိုလည်း စစ်ကောင်စီတပ်က မီးရှို့သွားသည်ဟု ဆိုသည်။

“ပေါက်မြို့နယ် တောင်ပိုင်းက ကျောက်အိုးရွာက စစ်ဘေးရှောင်ပြည်သူတွေပါ။ စခတွေဟာ ရွာလုံးကျွတ် မီးရှို့လို့အားမရဘူး ရှောင်ပုန်းသူတွေရဲ့ အစားအသောက် ရိက္ခာတွေပါ ထပ်မံမီးရှို့တယ်။ စစ်တပ်ကို ကြောက်လို့ တစ်ရွာလုံး ပြေးလွှား ဒုက္ခများနေကြရတယ်” ဟု Pauk Alliance Groupက ယနေ့ထုတ်ပြန်သည်။

ထို့​ကြောင့် စစ်ဘေးရှောင်များအတွက် အစားအသောက်၊ ရိက္ခာ ၊ ဆေးဝါး၊ လူသုံးကုန်ပစ္စည်းများ အရေးပေါ် လိုအပ်လျက်ရှိသည်ဟုလည်း အသိပေးထားသည်။

Public Service Announcement

ပေါက်မြို့နယ် ပြည်သူ့ကာကွယ်ရေးတပ်မှ တပ်ဖွဲ့ဝင်တစ်ဦးကမူ စစ်ကောင်စီတပ် မီးရှို့ဖျက်ဆီးသွားသည့် ကျေးရွာနှင့် အိမ်ခြေအရေအတွက်ကို စစ်တမ်းပြုစုနေကြောင်း၊ နေအိမ်များ မီးရှို့ခံရသည့်ဒေသခံများအနေဖြင့် တောထဲ၌ ပုန်းရှောင်နေရဆဲဖြစ်ပြီး နွေကာလဖြစ်၍ အပူဒဏ်အပါအဝင် အခက်အခဲများစွာ ကြုံတွေ့နေရကြောင်း ပြောကြားသည်။

စစ်ကော်စီတပ်၏ အကြမ်းဖက်လုပ်ရပ်များကြောင့် ဒေသခံများ အသက်ဆုံးရှုံးခဲ့ကြရပြီး အရေအတွက် စိစစ်ဆဲဖြစ်သည်ဟု ၎င်း က ပြောသည်။ ထို့ပြင် အိမ်မွေးတိရိစ္ဆာန်များစွာလည်း သေဆုံးခဲ့သည်ဟု ဆိုသည်။