မုံရွာပင်မသပိတ်စစ်ကြောင်းလုံခြုံရေးအတွက် ဧပြီ ၁၇ ရက်တွင် ပွိုင့်ကင်းစောင့်နေစဉ် အကြမ်းဖက်စစ်ကောင်စီလက်နက်ကိုင်များနှင့် လက်ပါးစေပျူစောထီးသောင်းကျန်းသူများ၏ အင်အားအလုံးအရင်းဖြင့်ပိတ်ဆို့ဖမ်းဆီးခြင်းကိုခံရပြီး ပစ်ခတ်ခံရသဖြင့်ကျဆုံးခဲ့ရသောချောင်းဦးမြို့နယ်ပြည်သူ့ကာကွယ်ရေးတပ်ဖွဲ့ မှ သူရဲကောင်းအာဇာနည်ရဲဘော် (၅) ဦး၏ ရုပ်ကလာပ်များကို ယနေ့ စစ်အခမ်းအနားဖြင့်ကောင်းမွန်စွာ သင်္ဂြိုလ်ခဲ့ကြောင်း သတင်းဓါတ်ပုံများနှင့်တကွထုတ်ပြန်သည်။
“ရဲဘော်တို့ လွတ်မြောက်သွားကြပါပြီ ၊အေးချမ်းစွာ အနားယူကြပါတော့”ဟု ချောင်းဦးမြို့နယ်ပြည်သူကာကွယ်ရေးတပ်ဖွဲ့ CHUPDF ကရေးသားထားသည်။
ထိုအပြင် ဆရာကြီး မင်းသု၀ဏ်၏ ကဗျာစာသားဖြစ်သော “ယမ်းငွေ့အူအူ တလူလူနှင့် မေးမြူကြတုန်း အနောက်ကုန်းတွင် နေလုံးကွယ်ချေပြီ တကား” ဟုကျဆုံးသူရဲကောင်းများကိုဂုဏ်ပြု၍ကောက်နှုတ်ဖော်ပြထားသည်ကိုလည်း တွေ့ရသည်။
အဆိုပါသတင်းထုတ်ပြန်ချက်အောက်တွင်ပြည်သူများကလည်းကျဆုံးသူရဲကောင်းများအတွက် ဝမ်းနည်းကြောင်း၊ဂုဏ်ယူကြောင်းစသဖြင့်အသီးသီးရေးသားကြသည်။
“ရဲဘော်တို့က ပြည်သူတွေအတွက် ထာဝရသူရဲကောင်းတွေပါ ရင်ထဲမှာရဲဘော်တို့ရဲ့ တိုင်းပြည်နဲ့လူမျိုးအပေါ်မှာ ချစ်ခင်တဲ့စိတ် ဒီမိုကရေစီကို လိုလားတဲ့စိတ် အမှန်တရားကို မြတ်နိုးပီး မြန်မာနိုင်ငံအပေါ်ကို ချစ်မြတ်နိုးတဲ့ ရဲဘော်တို့ရဲ့ ရဲစွမ်းသတ္တိကို အစဥ်လေးစားဦးညွန့်လျက်ပါ”ဟုပြည်သူတစ်ဦးကရေးသားဂုဏ်ပြုသည်။
အခြားစာဖတ်သူတစ်ဦးကလည်း”လွတ်လပ်စွာအနားယူကြပါတော့ ကျန်နေတဲ့တိုက်ပွဲငါတို့နွှဲမယ်ရဲဘော်တို့”ဟုမှတ်ချက်ရေးသားထားသည်။