▪️ယနေ့ မိုးရွာ၍ နေအိမ်မီးရှို့ခံရသည့် ကျေးရွာများမှ စစ်ရှောင်များ အခက်အခဲကြုံနေ
▪️ပေါက်မြို့နယ် ပုသိမ် -မုံရွာလမ်းပိုင်း ယနေ့ညနေမှစ၍ ဖြတ်သန်းခြင်းမပြုရန် PDFတပ်ရင်း(၂) သတိပေး
မကွေးတိုင်း ပေါက်မြို့နယ်တောင်ပိုင်းရှိ ကျေးရွာ နှစ်ရွာအား အကြမ်းဖက်စစ်ကောင်စီတပ်က ယနေ့ ထပ်မံမီးရှို့ခဲ့ကြောင်း ဒေသခံတစ်ဦးက ပြောသည်။
မီးရှို့ခံရသည့် ကျေးရွာများမှာ ကင်းမရွာနှင့် ချောင်ဆုံရွာတို့ဖြစ်ပြီး ကင်းမရွာသည် တတိယအကြိမ် မြောက် မီးရှို့ခံရသည့် ကျေးရွာဖြစ်သည်။
Public Service Announcement
“မနက်က ကင်းမကို မီးရှို့တာ။ အခု ည ၇နာရီ ၄၀မှာတော့ ချောင်းဆုံရွာကို မီးရှို့တာ။ ချောင်းဆုံက ကင်းမရွာရဲ့အရှေ့ဘက်က။ တောင်ပိုင်းမှာ အရှို့မခံရတဲ့ရွာဆိုလို့ တစ်ရွာလောက်ပဲကျန်တော့တယ်။ သူတို့ဆက်တိုက်ရှို့နေတာ ၁၄ရွာ၊ ၁၅ရွာလောက်ရှိပြီ”ဟု ဒေသခံက ပြော သည်။
ယခု ဝင်လာသည့် စစ်ကောင်စီတပ်သည် ကျေးရွာများကိုသာမက တောထဲရှိ တဲများကိုပါ မီးရှို့ခဲ့၍ ယနေ့မိုးရွာသည့်အခါတွင် ဒေသခံများ အခက်အခဲများစွာကြုံခဲ့ရသည်ဟု ဆိုသည်။
“ဒီနေ့ရွာတာ။ ပေါက်တောင်ပိုင်းက မီးရှို့ခံရတဲ့ရွာတွေပေါ့။ မိုးသီးတွေလည်းကျတယ်။ ကျောက်အိုးရွာ ဆိုရင်တောထဲမှာ နေတဲ့တဲတွေကိုပါမီးရှို့သွားတော့သူတို့ကမိုးကာတွေနဲ့ မိုးက မလုံတော့ဘူး။ အခုကတော့ တိတ်သွားပြီ ညနေကတော့ မိုးကတော်တော်ရွာလိုက်တယ်” ဟု ဒေသခံက ပြောသည်။
ကျေးရွာအများအပြား မီးရှို့ခံရပြီး ကျေးရွာပေါင်းများစွာမှ ဒေသခံများ ထွက်ပြေးတိမ်းရှောင်နေကြရ၍ စစ်ရှောင်အရေအတွက်ကိုမှု လတ်တလော မခန့်မှန်းနိုင်သေးဟု ဆိုသည်။ လက်ရှိတွင် စားနပ်ရိက္ခာ အခက်အခဲနှင့် လူသုံးကုန်များ၊ မိုးကာများ အရေးပေါ် အကူအညီလိုအပ်လျက်ရှိကြောင်း ဒေသခံက ပြောသည်။
စစ်ကောင်စီတပ်သည် ပေါက်မြို့နယ်သို့ ဧပြီ ၇ရက်မှစ၍ စစ်ကြောင်းထိုးလျက်ရှိပြီး ကျေးရွာများကို မီးရှို့ခြင်း၊ ပြည်သူလူထုများကို ပစ်ခတ်တိုက်ခိုက်သတ်ဖြတ်ခြင်းများ လုပ်ဆောင်ခဲ့ရာ ရွာပေါင်း ၁၅ရွာထက်မနည်းမီးရှို့ခံခဲ့ရပြီး ပြည်သူ ၁၉ဦးထက်မနည်း အသက်ဆုံးရှုံးခဲ့ကြရသည်ဟုဆိုသည်။
ပေါက်တောင်ပိုင်းဒေသ၌ စစ်ကောင်စီတပ်များကို ဒေသကာကွယ်ရေးတပ်များက ရရာလက်နက်စွဲကိုင်ခုခံလျက်ရှိရာ စစ်ရေးတင်းမာနေဆဲဖြစ်သည်။
ပေါက်တောင်ပိုင်း ပြည်သူ့ကာကွယ်ရေးတပ်ဖွဲ့ အမှတ် (၂) တပ်ရင်းက ယနေ့တွင် အရေးပေါ်အသိပေးချက် ထုတ်ပြန်ခဲ့ရာ ပေါက်မြို့နယ်အတွင်းရှိ ပုသိမ်-မုံရွာ လမ်းပိုင်းကို ယနေ့ ညနေ ၆နာရီခွဲမှစ၍ မည်သည့်ယာဉ်မှ လုံး၀ ဖြတ်သန်းသွားလာခြင်းမပြုရန် နှိုးဆော်ထား သည်။
