▪️အသက်အန္တရာယ်အတွက် များစွာစိုးရိမ်နေရဟုဆို
အကြမ်းဖက်စစ်ကောင်စီ၏ အဓမ္မဖမ်းဆီးခြင်းခံရသည့် စစ်ကိုင်းပညာရေးတက္ကသိုလ်ကျောင်းသားများသမဂ္ဂ (ဗကသများအဖွဲ့ချုပ်)မှ ဥက္ကဌဖြစ်သူ မအေးနန္ဒာစိုးသည် ဖမ်းဆီးခံရချိန် (၇)လပြည့်သည်အထိ အဆက်အသွယ်မရ ဖြစ်နေပြီး မည်သည့်နေရာတွင် ထိန်းသိမ်းထားရှိသည်ကိုပင်မသိရှိရဘဲ ပျောက်ဆုံးနေကြောင်း ဗကသများ အဖွဲ့ချုပ်က ယနေ့ (ဧပြီ ၁၉)ထုတ်ပြန်သည်။
မအေးနန္ဒာစိုးသည် ပြီးခဲ့သည့် ၂၀၂၁ စက်တင်ဘာ ၁၉ ရက် ညနေပိုင်းက ခရီးသွားစဥ် စစ်ကောင်စီဝင်များ၏ အဓမ္မ ဖမ်းဆီးခံခြင်းကိုခံခဲ့ရခြင်း ဖြစ်သည်။
“ရဲဘော်အေးနန္ဒာစိုး ဖမ်းဆီးခံလိုက်ရချိန်ကစပြီး ကျွန်တော်တို့ တောက်လျှောက်စုံစမ်းတယ်။ ဖမ်းဆီးပြီးရက် အတော်ကြာတော့ တပ်မ(၃၃)ကနေ မန္တလေး နန်းတွင်းစစ်ကြောရေးမှာ ရှိနေတယ်လို့ သိရတယ်။ အကြမ်းဖက် ဖက်ဆစ်စစ်တပ်ရဲ့ငရဲခန်းတခုလိုဆိုးဝါးနှိပ်စက်လျက်ရှိတဲ့ အဲဒီနန်းတွင်းစစ်ကြောရေးမှာ လအတော်ကြာ နှိပ်စက်ခံထားရတဲ့ ဒဏ်ရာတွေနဲ့ လုံလောက်တဲ့ဆေးကုသခွင့်မရတဲ့အကြောင်းတွေ ပြန်သိခဲ့ရတာမျိုးရှိခဲ့တယ်။ ဒါတွေကလည်း စစ်ကြောရေးမှာ လအတော်ကြာအတူနေခဲ့ရပြီး ထောင်ရောက်ရှိသွားတဲ့ ရဲဘော်တွေကတဆင့်သိရတာမျိုး ဖြစ်တယ်”ဟု မအေးနန္ဒာစိုး ဖမ်းဆီးခံရပြီး ပျောက်ဆုံးနေမှုအပေါ် လိုက်လံစုံစမ်းနေသူ ဗကသများအဖွဲ့ချုပ် ရဲဘော်တစ်ဦးက ပြောသည်။
Public Service Announcement
သို့သော် ၂၀၂၂ ဖေဖော်ဝါရီလဆန်းပိုင်းကစ၍ နောက်ပိုင်းကာလများ၌ မအေးန္ဒာစိုး ရောက်ရှိနေသည့် နေရာနှင့် အဆက်အသွယ် လုံးဝပြတ်တောက်သွားပြီး (အိုးဘိုအကျဥ်းထောင်သို့မပို့ဘဲ) မည်သည့်နေရာကို ပို့ဆောင်လိုက်သည်ကိုပါ မသိရှိရကြောင်း စစ်ကိုင်းပညာရေးတက္ကသိုလ်ကျောင်းသားများသမဂ္ဂက ထုတ်ပြန်ခဲ့သည်။
လက်ရှိတွင် ဖမ်းဆီးခံမအေးနန္ဒာစိုး၏ အသက်အန္တရာယ်အတွက် များစွာ စိုးရိမ်နေရပြီး သက်ရှိထင်ရှား ရှိ၊ မရှိကိုပင်တိကျစွာ မသိရှိရသေးကြောင်း ထုတ်ပြန်ချက်၌ ဖော်ပြထားသည်။
ထိုသို့ (၇)လကြာ ဖမ်းဆီးထိန်းသိမ်းခံထားရပြီးပျောက်ဆုံးနေသည့် အသက်၂၃နှစ်အရွယ် ဗကသကျောင်းသူ မအေးနန္ဒာစိုး၏ အသက်အန္တရာယ်လုံခြုံရေးနှင့် အဆက်သွယ် တစ်စုံတစ်ရာရရှိစေရေးအတွက် အရပ်ဖက်အဖွဲ့အစည်းများ၊နိုင်ငံတကာအဖွဲ့အစည်းများ၊ ပြည်သူ့ရှေ့နေအဖွဲ့အစည်းများနှင့် တော်လှန်ရေးအဖွဲ့အစည်းများမှလည်း တတ်နိုင်သည့်ဖက်မှ ဝိုင်းဝန်းကူညီပေးကြပါရန်လည်း ဗကသများအဖွဲ့ချုပ်က တိုက်တွန်းခဲ့သည်။
