ရန်ကုန်-နေပြည်တော်အမြန်လမ်းတွင် ယနေ့(ဧပြီ ၂၄) နံနက်အစောပိုင်းက ခရီးသည်တင်ယာဥ်တစ်စီး ချောင်းထဲထိုးကျမှု ဖြစ်ပွားခဲ့သည်။
ယနေ့နံနက် ၄ နာရီ ၄၇မိနစ်ခန့်က အမြန်လမ်း (၉၉) မိုင် (၅)ဖာလုံတွင် နန်းထိုက်တော်ဝင် ခရီးသည်တင်ယာဥ် ချောင်းထဲကျသည့်ဖြစ်စဥ် ဖြစ်ပွားခဲ့ကြောင်း သွား ရောက်ကူညီပေးနေသည့် ဆင်ဖြူတော် လူမှုကူညီရေးအဖွဲ့က ထုတ်ပြန်သည်။
“ဖြစ်စဥ်အား ဆင်ဖြူတော်လေးများနှင့် ဆင်ဦးစီးများ သွားရောက်ကူညီ။ အသေအပျောက်မရှိ”ဟု ထုတ်ပြန်ချက်တွင် ဖော်ပြသည်။
အထက်ပါ နန်းထိုက်တော်ဝင်ယာဥ်သည် ပျော်ဘွယ်မြို့မှတဆင့် ရန်ကုန်မြို့သို့ ထွက်ခွာလာသည့် ခရီးသည်တင်ယာဥ်တစ်စီးဖြစ်ပြီး ဘီးပေါက်ရာမှ တံတားနှစ်စင်းကြားရှိ ချောင်းထဲသို့ ထိုးကျသွားခြင်းဖြစ်ကြောင်း အမြန်လမ်းမီးသတ်မှ တာဝန်ရှိသူတစ်ဦးက ပြောသည်။
ချောင်းထဲထိုးကျသည့်ဖြစ်စဥ်ကြောင့် အဆိုပါယာဥ်နှင့် လိုက်ပါလာသည့် ခရီးသည် ၁၁ ဦး ထိခိုက်ဒဏ်ရာရရှိခဲ့ပြီး ဒဏ်ရာရသူများအား မြို့ချောင်းဆေးရုံသို့ပို့ဆောင်ထားကြောင်း သိရသည်။