စက်တင်ဘာ-၃၊ ၂၀၂၆။ မိထက်/People’s Spring
ရန်ကုန်-နေပြည်တော်အမြန်လမ်း၊ မိုင်တိုင် ၃၂ အနီးမှာ ဒီနေ့ မနက် ၉နာရီခန့်က TikTokရိုက်နေတဲ့ အမျိုးသမီးတစ်ဦး ကားတိုက်ခံရတယ်လို့ သတင်းရရှ်ိပါတယ်။
အဲ့ဒီအမျိုးသမီးဟာ သူ့ကလေးငယ်ကို ကျောင်းပို့ပြီးအပြန်မှာ ဖုန်းနဲ့ TikTokရိုက်နေစဉ် ကားတိုက်ခံရတာလို့ ဒေသခံတစ်ဦးက ပြောပါတယ်။
“ရန်ကုန်ဘက်ကနေ အလာမှာ ဖြစ်တာ။ သူက လမ်းမပေါ်တက်ပြီး တစ်တော့ဆော့နေတာလို့ အတိုက်ခံရတာ မြင်တဲ့သူတွေကပြောကြတယ်” လို့ ကားလမ်းအနီးမှာ ရှိနေသူတစ်ဦးက ပြောပါတယ်။
Public Service Announcement
ကားတိုက်ခံရတဲ့ အမျိုးသမီးကို ဆေးရုံတင်ထားရတယ်လို့ သိရပြီး နောက်ဆက်တွဲအခြေအနေကိုတော့ မသိရသေးပါဘူး။
ရန်ကုန်- နေပြည်တော်အမြန်လမ်း၊ မိုင်တိုင် ၃၂ အနီးဝန်းကျင်ဟာ ယာဉ်တိုက်မှု မကြာခဏဖြစ်ပွားတဲ့နေရာလို့ ဒေသခံတွေက ပြောပါတယ်။
စက်တင်ဘာ ၁ရက် မနက်ကလည်း အဲဒီနေရာအနီးမှာ လမ်းဖြတ်ကူးတဲ့အမျိုးသမီးကို ခရီးသည်တင်ကားတစ်စီးက တိုက်မိလို့ သေဆုံးခဲ့တယ်လို့ သိရပါတယ်။
TikTokလူမှုကွန်ရက်သုံးစွဲမှုဟာ မြန်မာလူငယ်ထုကြားမှာ ပျံ့နှံ့နေပြီး အများပြည်သူနဲ့သက်ဆိုင်တဲ့နေရာတွေမှာ တစ်တော့ကစားကြလို့ မတော်တဆထိခိုက်မှုတွေဖြစ်တဲ့အပြင် နည်းပညာပိုင်းဆိုင်ရာလုံခြုံရေးအတွက်လည်း သတိပေးမှုတွေ ရှိနေပါတယ်။
