▪️အကြမ်းဖက်စစ်ကောင်စီသည် ချမ်းချမ်း၏ နေအိမ်အား လုယူချိပ်ပိတ်ပြီးနောက် ပြန်ရောင်းချရန် ကြိုးပမ်းနေဟုဆို
အကြမ်းဖက်စစ်ကောင်စီက မတရားလုယူချိပ်ပိတ်ထားသည့် နေအိမ်များအား ရောင်းချရန်စီစဉ်နေသောကြောင့် မဝယ်ယူရန် အဆိုတော်ချမ်းချမ်းက တိုက်တွန်းလိုက်သည်။
“မတရားမှုကိုအားမပေးပါနဲ့ ကျမတို့အရာရာပေးဆပ်ထားကြတာ အသက်တေ ပစ္စည်းတွေ အိမ်တွေ မတရားယူချင်တဲ့သူတွေကိုအားမပေးပါနဲ့ ။ကျမရဲ့သန်လျင်အိမ်ကိုစစ်ကောင်စီက မတရားချိတ်ပိတ်ပီး အခုပဲအိမ်ဖွင့်ပီးရောင်းစားဖို့ကြိုးစားနေပါတယ် ။အဲ့ဒီ့အိမ်ကိုမဝယ်ကြပါနဲ့ ဝယ်တဲ့သူဟာတရားမဝင်ပါဘူးနော်၊ ဝိုင်းတားပေးကြပါ။ တော်လှန်ရေးပီးရင် ကျမတို့ ကိုယ့်ပစ္စည်းကိုယ်ပြန်ရအောင်ပြန်ယူကြတဲ့အခါ ဝယ်ထားတဲ့သူဟာ အလကားဖြစ်သွားပါလိမ့်မယ် “ဟု ချမ်းချမ်းက ၎င်း၏ဖေ့စ်ဘွခ်တ်ခ်စာမျက်နှာမှတစ်ဆင့် မေ ၁ ရက်ကရေးသားထားသည်။
အကြမ်းဖက်စစ်ကောင်စီသည် အဆိုတော်ချမ်းချမ်း၏ နေအိမ်အား လုယူချိတ်ပိတ်ပြီးနောက် အဆိုပါ နေအိမ်အား ပြန်လည်ရောင်းချ၍ ငွေရှာဖွေရန် ကြိုးပမ်းနေခြင်း ဖြစ်သည်။
Public Service Announcement
အကြမ်းဖက်စစ်ကောင်စီက ချိတ်ပိတ်ထားသည့် နေအိမ်များအား ဝယ်ယူခြင်းမှာ ဝယ်ယူသူအတွက် အရှုံးသာရမည်ဟု ချမ်းချမ်းက ဆိုသည်။
“အိမ်စာချုပ်တွေဟာ ကျမတို့အိမ်ပိုင်ရှင်တွေဆီမှာပဲ ရှိတာမို့ တရားမဝင်ပါဘူး။ အများသိအောင် share ပေးကြပါ”ဟု ချမ်းချမ်းက ရေးသားထားသည်။
ချမ်းချမ်းသည် ရင်သွေးမွေးဖွားရန် ခင်ပွန်းဖြစ်သူရှိသည့် အီတလီနိုင်ငံသို့သွားရောက်ခဲ့ရာမှ စစ်အာဏာရှင်ဆန့်ကျင်ရေး၌ ပြည်သူနှင့်အတူ ပါဝင်ခဲ့သောကြောင့် ပုဒ်မ ၅၀၅(က)ဖြင့် မတရားပုဒ်မတပ်ခံခဲ့ရခြင်းဖြစ်သည်။
ချမ်းချမ်း၏ နေအိမ်ကို အကြမ်းဖက်စစ်ကောင်စီက ဖေဖော်ဝါရီ ၁၉ ရက်တွင် ချိတ်ပိတ်ခဲ့ခြင်းဖြစ်သည်။
အကြမ်းဖက်စစ်ကောင်စီသည် အမျိုးသားညီညွတ်ရေးအစိုးရ အဖွဲ့၏ ဝန်ကြီးများ၏ နေအိမ်များအပါအဝင် ဒီချုပ်ပါတီဝင်များ၊ စစ်အာဏာရှင်ဆန့်ကျင်ရေးလှုပ်ရှားသူများနှင့် ပုဒ်မ ၅၀၅ ဖြင့် မတရားအမှုဖွင့်ခံရသူအချို့ ၏ နေအိမ်များအား လုယူချိပ်ပိတ်နေသည်။
