ကရင်နီ(ကယား)ပြည်နယ်၊ ဘောလခဲမြို့နယ်တွင် စစ်ကောင်စီယာဥ်တန်းတိုက်ခိုက်ခံရပြီး ယာဥ်နှစ်စီးပျက်စီးကာ လက်နက်ခဲယမ်းအချို့ သိမ်းဆည်းရမိကြောင်း Karenni’s Voice က ထုတ်ပြန်သည်။
တိုက်ပွဲဖြစ်စဥ်မှာ ယနေ့(မေ ၄ ရက်) နံနက် ၄နာရီခန့်က နန်းဖဲကျေးရွာမှ ဘောလခဲမြို့နယ်ဘက်သို့ ရိက္ခာလာပို့သည့် စစ်ကောင်စီယာဉ်တန်းကို ကရင်နီပူးပေါင်းတပ်(KA)နှင့် KNDF B-16 တို့ ပူးပေါင်းတိုက်ခိုက်ခဲ့ခြင်းဖြစ်သည်။
တိုက်ခိုက်မှု ဖြစ်စဥ်တွင် စစ်ကောင်စီဘက်မှ အထိအခိုက်အကျအဆုံးကို မသိရသေးသော် လည်း ယာဉ်နှစ်စီးပျက်စီးသွားပြီး လက်နက်ခဲယမ်းအချို့ သိမ်းဆည်းရမိခဲ့သည်။
“တိုက်ပွဲက မနက် ၄ နာရီ ဝန်းကျင်လောက်ထဲက ဖြစ်တာ ကျွန်တော်တို့ မိုင်းကို သူတို့နင်းမိတာပေါ့ နော်။စစ်ကားနှစ်စီးတော့ ပျက်စီးသွားလို့ သူတို့ဘာသာမီးရှို့သွားတာ ကျွန်တော် တို့ မိုင်းအချို့နဲ့ ကျည်အချို့ရခဲ့တယ်”ဟု ကရင်နီအမျိုးသားများကာကွယ်ရေးတပ် KNDF B-16 တာဝန်ရှိသူက ပြောသည်။
Public Service Announcement
ကရင်နီ(ကယား)ပြည်နယ်ရှိ ပြည်သူလူထုနှင့် စစ်ဘေးရှောင်ပြည်သူများအနေဖြင့် ဘောလခဲ မြို့နယ်(နန်းဖဲ-ဘောလခဲ)လမ်းမကြီးကို လုံးဝ ဖြတ်သန်းသွားခြင်းမပြုရန်လည်း ကရင်နီအမျိုးသားများကာကွယ်ရေးတပ် KNDF က ထုတ်ပြန်ထားသည်။
ထိုလမ်းပိုင်းတွင် အကြမ်းစစ်ကောင်စီက စစ်ကြောင်းထိုးနေသောကြောင့် ယနေ့(ဧပြီ ၁၈ ရက်ကစ၍ မေလ ၁၈ ရက်)အထိ တစ်လတိတိ အသုံးမပြုရန်လည်း သတိပေးသည်။
ယမန်နေ့(မေ ၃ ရက်)က ဒီးမော့ဆို နှင့် ဖရူဆိုမြို့နယ်တွင် ထိတွေ့တိုက်ပွဲ ၌အကြမ်းဖက်စစ်ကောင်စီတပ်သား လေးဦးထက်မနည်းသေဆုံးကြောင်း သက်ဆိုင်ရာတပ်ဖွဲ့များက ထုတ်ပြန်ထားသည်။
