အကြမ်းဖက်စစ်ခေါင်းဆောင်နှင့် ငြိမ်းချမ်းရေးဆွေးနွေးရန် အချိန်ကောင်းမဟုတ်ဟု KNPP ထုတ်ပြန်

အကြမ်းဖက်စစ်ကောင်စီခေါင်းဆောင်မင်းအောင်လှိုင်၏ ငြိမ်းချမ်းရေးတွေ့ဆုံဆွေးနွေးမှု ဖိတ်ခေါ်ချက်သည် တွေ့ဆုံဆွေးနွေးရန် အချိန်ကောင်းမဟုတ်ကြောင်း ကရင်နီအမျိုးသားတိုးတက်ရေးပါတီ(KNPP)က ယနေ့ထုတ်ပြန်သည်။

မင်းအောင်လှိုင်၏ ဖိတ်ခေါ်မှုသည် “တစ်နိုင်ငံလုံး လွှမ်းခြုံသည့် တွေ့ဆုံဆွေးနွေးမှု မဖြစ်သကဲ့သို့ လက်ရှိ ဖြစ်နေသည့် နိုင်ငံ၏ နိုင်ငံရေးအကြပ်အတည်း များကို ဖြေရှင်းနိုင်ရန် ကြိုးပမ်းဖော်ထုတ်မှု မဟုတ်သဖြင့် ဤ ဖိတ်ခေါ်မှုသည် တွေ့ဆုံဆွေးနွေးရန်အတွက် အချိန်ကောင်းမဟုတ်ပေ” ဟု KNPP က ထုတ်ပြန်သည်။

ကချင်လွတ်လပ်ရေးအဖွဲ့/ကချင်လွတ်လပ်ရေးတပ်မတော်(KIO/KIA)ကလည်း အကြမ်းဖက်စစ်ခေါင်းဆောင်၏ ငြိမ်းချမ်းရေးဆွေးနွေးပွဲကို တက်ရောက်မည်မဟုတ်ဟု အကြောင်းပြန်ကြား ခဲ့သည်။ပါဝင်သင့်သူအားလုံးပါဝင်နိုင်ပြီး နိုင်ငံ၏အရေးအရာများကို တန်းတူဆွေးနွေးနိုင်မည့် အချိန်အခါ၊ အခင်းအကျင်းရောက်မှသာ KIO/KIA က ပါဝင်ဆွေးနွေးမည်ဟု ထုတ်ပြန်ထားသည်။

လက်ရှိနိုင်ငံရေးအကျပ်အတည်းများကို ဖြေရှင်းနိုင်ရန် တာဝန်ယူမှု၊ တာဝန်ခံမှုအပြည့်ဖြင့် တိုင်း ပြည်နှင့်လူထု၏ မျက်နှာအား မျက်မှောက်ပြုကာ ပါဝင်သင့်ပါဝင်ထိုက်သော အင်အားစုများပါဝင်သည့် တွေ့ဆုံဆွေးနွေးမှုဖြစ်ပေါ်ရေး KNPP က ​အောက်ပါအချက်သုံးချက်ကိုတောင်းဆိုသည်။

Public Service Announcement

စစ်တပ်၏ နိုင်ငံတဝန်းထိုးစစ်ဆင်မှုများကိုခြွင်းချက်မရှိရပ်တန့်ရန်၊ စစ်အင်အားဖြည့်တင်းမှုများကို ချက်ချင်းရုတ်သိမ်းရန်၊ စစ်ဘေးရှောင်ပြည်သူများကို လွတ်လပ်စွာပံ့ပိုးကူညီနိုင်ရေး ဆောင် ရွက်ခွင့်ပြုရန်နှင့် ပြည်သူလူထုကို မတရားညှင်းဆဲသတ်ဖြတ်ခဲ့သော စစ်ကောင်စီမှ ကျူးလွန်သူ အားလုံးကို အရေးယူရန် အချက်များကို KNPP က တောင်းဆိုသည်။