ရွှေဘိုနှင့် ဝက်လက်မြို့နယ်အစပ်ရှိ ကျေးရွာသုံးရွာကို စစ်ကောင်စီတပ် မီးရှို့ဖျက်ဆီး

အကြမ်းဖက်စစ်ကောင်စီတပ်က စစ်ကိုင်းတိုင်း ရွှေဘိုနှင့်ဝက်လက်မြို့နယ်အစပ်ရှိ ကျေးရွာများအား စစ်ကြောင်းထိုးနေပြီး ကျေးရွာသုံးရွာအား မီးရှို့ဖျက်ဆီးခဲ့မှုကြောင့် ရွာလုံးကျွတ်နီးပါး မီးလောင်ပျက်စီးသွားကြောင်းဒေသခံများက ပြောသည်။

ရွှေဘိုမြို့နယ်နှင့် ဝက်လက်မြို့နယ်အစပ်တွင်ရှိသော ကုလားမရွာ၊ လက်ကောက်ကျရွာ၊ ထုံးဘိုကုန်းကျေးရွာတို့ကို အကြမ်းဖက်စစ်တပ်က ယမန်နေ့(မေလ ၅ ရက်) မွန်းလွဲ ၂နာရီခွဲဝန်းကျင်တွင် ဝင်ရောက်စီးနင်းခဲ့သည်။

နေအိမ်များအတွင်း ဝင်ရောက်ရှာဖွေမွှေနှောက်မှုများပြုလုပ်ခဲ့ပြီး ညနေ ၄နာရီခန့်တွင် စတင်မီးရှို့ဖျက်ဆီးခဲ့မှု့ကြောင့် သုံးရွာလုံးရွာလုံးကျွတ်နီးပါး မီးလောင်ကျွမ်းခဲ့ရကြောင်း ​ဒေသခံများက ပြောသည်။

အကြမ်းဖက်စစ်တပ်သည် ရွာမြောက်ဘက်ရှိ ကြံခင်းများကိုလည်း မီးရှို့ဖျက်ဆီးသွားခဲ့သည်။ ထို့အပြင် အကြမ်းဖက်စစ်တပ်သည် ကုလားမကျေးရွာနှင့် လက်ကောက်ကျကျေးရွာတို့မှ ပြည်သူ ၃ဝခန့်ကို ရိုက်နှက် ခေါ်ဆောင်ကာ ကုလားမကျေးရွာအတွင်း၌ ဖမ်းဆီးထားကြောင်း ​ဒေသခံများက ပြောသည်။

Public Service Announcement

ကုလားမရွာနှင့် လက်ကောက်ကျရွာတို့သည် ရွာချင်းဆက်နေပြီး နှစ်ရွာပေါင်းအိမ်ခြေ ၁,ဝဝဝ ခန့်ရှိသည်။ အကြမ်းဖက်စစ်ကောင်စီတပ်ရန်ကြောင့် ရွာသူရွာသားများ ထွက်ပြေးတိမ်းရှောင်နေရ၍ ပျက်စီးမှုအခြေအနေ အတိအကျမသိရသေးပါ။

အကြမ်းဖက်စစ်တပ်သည် ဝက်လက်နယ်၊ ခက်သင်တောင်ပေါ်နှင့် စဥ့်ကူးနယ်ဘက်မှလည်းလက်နက်ကြီးများတပ်ဆင်ကာ ထုံးဘိုကုန်းရွာဘက်သို့ ဦီးတည် ရမ်းပစ်ခတ်နေ၍ ရွာနေပြည်သူများ ထွက်ပြေးနေရကြောင်း ဒေသခံများက ပြောသည်။