ကေအဲန်ယူ-ဖားအံမြို့နယ် သံလွင်အနောက်ဘက်ကမ်းဒေသက အရပ်သားတစ်ဦးကို စစ်ကောင်စီနဲ့ နယ်ခြားစောင့်တပ်(BGF)ပူးပေါင်းအဖွဲ့က သေနတ်နဲ့ပစ်သတ်ခဲ့တယ်လို့ ကေအဲန်ယူက သတင်းထုတ်ပြန်ထားပါတယ်။
မေလ ၅ ရက် မနက် ၁၀ နာရီခန့်က စစ်ကောင်စီနဲ့ BGF ၁၀၁၄ ပူးပေါင်းတပ်ဖွဲ့တွေဟာ ကေအဲန်ယူ-ဒူးသထူခရိုင် တပ်မဟာ ၁ ဖားအံမြို့နယ်ထဲက ထီးကျူကျေးရွာနဲ့ မဲသနကျေးရွာ(ကျေဖာလဲ့)အကြားမှာ အရပ်သားတစ်ဦးကို သေနတ်နဲ့ပစ်သတ်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
စစ်ကောင်စီနဲ့ BGF ၁၀၁၄ ပူးပေါင်းတပ်ဖွဲ့တွေရဲ့ သတ်ဖြတ်ခြင်းခံရတဲ့သူဟာ ထီးကျော်ခီးရွာမှာနေထိုင်တဲ့ အသက်(၄၂) နှစ်အရွယ် စောဖားတရုတ်ဖြစ်ပြီး ကျေးရွာလူကြီးဟောင်းတစ်ဦးလည်းဖြစ်တယ်လို့ ထုတ်ပြန်ချက်မှာပါရှိတာပါ။
” ဆိုင်ကယ်နဲ့ နွားစာသွားယူတာတဲ့။ BGF နဲ့ စစ်ကောင်စီ ပူးပေါင်းတပ်ဖွဲ့တွေက ဆိုင်ကယ်ကိုရပ်ဖို့လှမ်းပြောတာ ဆိုင်ကယ်သံနဲ့ဆိုတော့ မကြားတာလည်းဖြစ်နိုင်တယ်၊ အဲဒါကို နောက်ကျောဖက်က သေနတ်နဲ့ပစ်တာ တင်ပါးကနေအရှေ့ဖက် ဆီးအိမ်ကို ပေါက်ထွက်ပြီးသေသွားတယ်” လို့ မြေပြင်သတင်းအရင်းမြစ်ကနေသိရကြောင်း ကေအဲန်ယူကဆိုထားပါတယ်။
Public Service Announcement
နယ်ခြားစောင့်တပ် အမှတ် ၁၀၁၄ တပ်ရင်းဟာ ဗိုလ်မှူးမောင်ချစ်ဦးဆောင်တဲ့တပ်ရင်းဖြစ်ပြီး ကေအဲန်ယူ-ဘီးလင်းမြို့နယ်ထဲက ဝင်းတာပန်နဲ့လေးကေဒေသက BHG စခန်းဘက်ကို စစ်ကူပေးဖို့လာရောက်တာဖြစ်တယ်လို့ သိရပါတယ်။
“လေးကေနဲ့ ဝင်းတာပန်စခန်းတွေအတွက် စစ်ကူလာပေးတာလို့သိရတယ်။ သူတို့စထွက်တာက မိတ္ထီလာ (ဘုရားကုန်း) BGF- ၁၀၁၄ စခန်းကနေ ကေအဲန်ယူဖားအံမြို့နယ်ထဲက ထီးကျူရွာ၊ နို့အောလာရွာ အဲဒီကတစ်ဆင့် ဝင်းတာပန်နဲ့ လေးကေ ဖက်ကိုတက်သွားတယ်” လို့ ကေအဲန်ယူ-ဖားအံမြို့နယ် သတင်းတာဝန်ခံပြောပါတယ်။
အဆိုပါ BGF ၁၀၁၄နဲ့ စစ်ကောင်စီပူးပေါင်းတပ်ဖွဲ့တွေဟာ အင်အား ၃၀ ကနေ ၅၀ ခန့်ရှိနိုင်ပြီး စစ်ကူသွားရာလမ်းတလျှောက်က ဒေသခံပြည်သူ အယောက် ၄၀ ကျော်ကို လူသားဒိုင်းအဖြစ်အသုံးချဖို့နဲ့ စားနပ်ရိက္ခာနဲ့ စစ်သုံးပစ္စည်းတွေသယ်ခိုင်းဖို့ အဓမ္မဖမ်းဆီးခေါ်ဆောင်သွားတာလာလို့ ကေအဲန်ယူရဲ့ ထုတ်ပြန်ထားချက်အရ သိရပါတယ်။
