အာဆီယံရဲ့ ကူညီထောက်ပံ့မှုအစီအစဉ် စစ်ကောင်စီအတွက်သာ အကျိုးဖြစ်စေမယ်လို့ SAC-M ထောက်ပြ

မြန်မာနိုင်ငံအတွက် လူသားချင်းစာနာထောက်ထားမှုအကူအညီပေးရာမှာ အာဆီယံအနေနဲ့ စစ်ကောင်စီကိုထိန်းချုပ်ခွင့်ပေးလိုက်တာဟာ စစ်ကောင်စီအတွက် သာ အကျိုးရှိစေမယ်လို့ ကုလသမဂ္ဂအရေးကျွမ်းကျင်သူတွေနဲ့ဖွဲ့စည်းထားတဲ့ မြန်မာနိုင်ငံဆိုင်ရာအထူးအကြံပေးကောင်စီ (SAC-M)က ထုတ်ပြန်ပါတယ်။

ဒီလို ကူညီထောက်ပံ့ရေးမှာ စစ်ကောင်စီကို ကိုင်တွယ်ခွင့်ပေးတာဟာ လူသားချင်းစာနာထောက်ထားမှုအကူအညီပေးရေးအခြေခံကျတဲ့ စည်းမျည်းတွေကိုမလေးစားရာရောက်တယ်လို့ လည်း SAC -M က ထောက်ပြထားပါတယ်။

မေလ ၆ ရက်က ကမ္ဘောဒီးယားနိုင်ငံ ၊ဖနွမ်းပင်မှာ မြန်မာနိုင်ငံကို လူသားချင်းစာနာမှုဆိုင်ရာ အကူအညီပေးနိုင်ရေး အာဆီယံဆိုင်ရာအတိုင်ပင်ခံအစည်းအဝေး ပြုလုပ်ခဲ့ပါတယ်။ အဲဒီအစည်းအဝေးကို စစ်ကောင်စီရဲ့အပြည်ပြည်ဆိုင်ရာဝန်ကြီး တက်ခွင့်ရခဲ့သလိုအာဆီယံကနေ ပေးအပ်မယ့် အကူအညီတွေကို စစ်ကောင်စီက တဆင့်သွားဖို့သဘောတူညီခဲ့ကြတာပါ။

မြန်မာနိုင်ငံကအကူအညီလိုအပ်နေသူတွေထံကို အာဆီယံအနေနဲ့ ကူညီကယ်ဆယ်ရေးပစ္စည်းတွေ ပံ့ပိုးရာမှာလည်း စစ်ကောင်စီက သတ်မှတ်ထားတဲ့ ဒေသတွေကိုသာ ဖြန့်ဝေခွင့်ရမှာဖြစ်တယ်လို့ SAC -M ကဆိုထားပါတယ်။

Public Service Announcement

မြေပြင်အခြေအနေအရ အာဏာသိမ်းပြီးနောက် မြန်မာနိုင်ငံမှာ အကူအညီလိုအပ်နေသူ ၁၄ သန်းကျော်ရှိပြီး လူပေါင်း ၈ သိန်းကျော်ဟာနေရပ်စွန့်ခွာတိမ်းရှောင်နေရပါတယ်။ အကူအညီလိုအပ်နေသူအများစုဟာ ပဋိပက္ခဖြစ်ပွားရာဒေသတွေနဲ့ နယ်စပ်ဒေသတွေမှာ ရှိနေကြပါတယ်။

ဒါပေမယ့် စစ်ကောင်စီဟာ နယ်စပ်ဖြတ်ကျော်ပြီး အကူအညီပစ္စည်းတွေထောက်ပံ့တာကို ငြင်းဆန်ထားပါတယ်။

ဒါကြောင့် အာဆီယံအနေနဲ့ လူသားချင်းစာနာထောက်ထားမှုအကူအညီပေးရာမှာ ထိရောက်ဖို့အတွက် NUG အပါအဝင် သက်ဆိုင်ရာအဖွဲ့အစည်းတွေနဲ့ဆွေးနွေးတိုင်ပင် ပူးပေါင်းလုပ်ဆောင်သင့်တယ်လို့ SAC- M က အကြံပြုထားပါတယ်။

ဓာတ်ပုံ − AP