ထီးလင်းမြို့နယ်အတွင်း ကာလကြာရှည်စွာ ဖြတ်တောက်ထားသည့် အင်တာနက်လိုင်းနှင့် ဖုန်းလိုင်းများ တစ်လအတွင်း လိုင်းပြန်ဖွင့်ပေးရန် ထီးလင်းပြည်သူ့ကာကွယ်ရေးတပ်(PDF)နှင့် ထီးလင်း ယောဒေသကာကွယ်ရေးတပ်(YDF)တို့က တောင်းဆိုခဲ့ပြီး ပြန်မရပါက ဆက်သွယ်ရေး တာဝါတိုင်များအားလုံးကို ဖြိုချသွားမည်ဟု ထုတ်ပြန်သည်။
စစ်တပ်၏ အာဏာသိမ်းပြီးနောက်ပိုင်း ထီးလင်းမြို့နယ်တွင် အင်တာနက်ကိုအချိန်အကန့်အသတ်ဖြင့်သာရရှိခဲ့ပြီးနောက် ယမန်နှစ် စက်တင်ဘာကစ၍ အင်တာနက်လုံးဝဖြတ်တောက်ခြင်းခံခဲ့ရသည်ဟု ဆိုသည်။
ထို့ကြောင့် ယခုအချိန်တွင် အင်တာနက်လုံးဝမရရှိသည်မှာ ရှစ်လကျော်ကြာမြင့်ခဲ့ပြီဟု အသိပေးသည်။
“အခုထီးလင်းက ဖုန်းကိုခေါ်ရင်တောင် ဝင်ချင်မှ ဝင်တာ။ဆက်သွယ်ရေးက တအားခက်ခဲနေတယ်။ဒါကြောင့် အများပြည်သူအကျိုးကို ရှေးရှုပြီးတောင်းဆိုတာ ဖြစ်တယ်။ဒါကို မဖြည့်ဆည်းပေးနိုင်ရင် တာဝါတိုင်တွေရှိလည်း ဘာမှ မထူးတော့ဘူး”ဟု YDF ထီးလင်း တာဝန်ရှိသူက People’s Springသို့ ပြောသည်။
Public Service Announcement
ပြည်သူ့ကာကွယ်ရေးရဲဘော်တစ်ဦးကလည်း” ကျွန်တော်တို့ လူငယ်တွေနဲ့ ချတာ။ ချကြစမ်း။ ယောကျ်ား ယောကျ်ားချင်းချတာ။ အခုတော့ ဆက်သွယ်ရေးကုမ္ပဏီတွေက စစ်ကောင်စီ သူရဲဘောကြောင်သမျှ ခိုင်းတာလိုက်လုပ်ပေးနေတယ်။ လိုင်းတွေ ပိတ်ထားတာဟာ ညွှန်ကြားသူရော လိုက်နာသူရော အောက်တန်းကျတာ”ဟု ပြော သည်။
ထို့အပြင် ထီးလင်းမြို့နယ်ဧရိယာ ၅၀ ရာခိုင်နှုန်းခန့်သာပုံမှန်ဖုန်းလိုင်းရရှိပြီး စစ်ကြောင်းများထိုးသည့်အချိန်တိုင်း ထိုဖုန်းလိုင်းများကိုဖြတ်တောက်ပစ်သဖြင့် ပြည်သူအများသတင်းမရရှိပဲ အခက်အခဲကြုံနေရသည်ဟုလည်း ဖော်ပြသည်။
ထို့ကြောင့် ဆက်သွယ်ရေးကုမ္ပဏီများအနေဖြင့် ထမင်းရှင် ပြည်သူများ၏မျက်နှာကိုမကြည့်ပဲ စစ်ကောင် စီအလိုကျ အင်တာနက်ဖြတ်တောက်ခြင်း၊ဖုန်းလိုင်းဖြတ်တောက်ခြင်းများပြုလုပ်နေပြီး (Comsumer Rights) ချိုးဖောက်နေခြင်းများကို ယခုချက်ခြင်းရပ်တန့်၍ ထီးလင်းတစ်မြို့နယ်လုံးအား အင်တာနက်ပြန်ဖွင့်ပေးရန် တောင်းဆိုသည်။
ယခု တောင်းဆိုချက်ကို ယနေ့(မေ ၁၂ရက်)မှ နောက်တစ်လအတွင်း အကောင်အထည်ဖော်ရန်နှင့် တစ်လပြည့်ချိန်ထိ အင်တာနက်လိုင်းနှင့်ဖုန်းလိုင်းများ ပြန်လည်မရရှိပါက ထီးလင်းမြို့နယ်တွင်းရှိဆက်သွယ်ရေးတာဝါတိုင်များအားလုံးကို တစ်စစီဖြိုချကာ တော်လှန်ရေးအတွက်အသုံးချသွားမည်ဟု အသိပေးသည်။
