●ရွှေအသင်းဖွင့်သောဈေးမှာ ပြင်ပဈေးကွက်ပေါက်ဈေးထက်နည်းနေ
ပြည်တွင်းရွှေဈေး အခေါက်ရွှေ တစ်ကျပ်သားကိုကျပ် ၁၉သိန်းခွဲအောက်ကျဆင်းလာသော်လည်း ဈေးကွက်အတွင်း ရွှေဝယ်ယူ၍ မရတော့ကြောင်း ပြည်တွင်းရွှေလုပ်ငန်းရှင်များကပြောသည်။
ပြည်တွင်းရွှေဈေးကို ရန်ကုန်တိုင်းရွှေလုပ်ငန်းရှင်များအသင်းက အခေါက်ရွှေတစ်ကျပ်သားကို ၁,၉၄၆,၇၀၀ကျပ်ဖြင့် မေ ၁၃ ရက်က ဈေးဖွင့်ခဲ့သော်လည်း ထိုဈေးနှုန်းဖြင့် ဈေးကွက်တွင်ဝယ်ယူ၍မရကြောင်း ရွှေလုပ်ငန်းရှင်များကပြောသည်။
အပြင်ပေါက်ဈေးမှာ လက်တွေ့ဝယ်တော့ သိန်း နှစ်ဆယ်နဲ့လေးသောင်း၊ သိန်းနှစ်ဆယ်နဲ့ ခုနှစ်သောင်းခွဲ (ကျပ်)ပေးရတယ်။ ဒါတောင် ဝယ်ချင်သလို ဝယ်လို့မရဘူး”ဟု မေ ၁၃ ရက်က ရွှေဝယ်ယူခဲ့သူတစ်ဦးကပြောသည်။
Public Service Announcement
ရွှေဆိုင်များတွင် အခေါက်ရွှေကို ဝယ်ယူရန် ခက်ခဲပြီး ဆိုင်အများစု မရောင်းချကြောင်းလည်း ၎င်းကဆက်ပြောသည်။
ရွှေရောင်းချသည့် ဆိုင်များတွင် ရန်ကုန်တိုင်းရွှေလုပ်ငန်းရှင်များအသင်းကသတ်မှတ်သည့်ဈေးထက် အခေါက်ရွှေကိုကျပ် တသိန်းကျော် ပိုပေးရသည်ဟုလည်း အခြားရွှေဝယ်သူတစ်ဦးကပြောသည်။ တစ်ဦးလျှင် တကျပ်သားထက် ပိုမရောင်းကြောင်းလည်း အဆိုပါရွှေဝယ်ခဲ့သူကပြောသည်။
ပြည်တွင်းရွှေထွက်နည်းလာခြင်းကြောင့် ရွှေကုန်သည်များတွင် ရွှေကုန်ကြမ်းပြတ်လပ်လာခြင်းကြောင့် ရွှေအရောင်းကို ရပ်တန့်ထားရခြင်းဖြစ်သည်ဟု ရွှေဆိုင်ပိုင်ရှင်တစ်ဦးကပြောသည်။
စစ်တပ်က အာဏာသိမ်းပြီးနောက် ကျပ်ငွေတန်ဖိုးစံချိန်တင်ကျဆင်းကာဒေါ်လာနှင့်ရွှေ ဈေးများ ဆက်တိုက်တက်ခဲ့ရာ ၂၀၂၁ စက်တင်ဘာလတွင် ရွှေတစ်ကျပ်သား ၂၂ သိန်းကျော်ထိ့ဈေးတက်ခဲ့သည်။ ရွှေဈေးတက်သဖြင့်လုပ်ငန်းရှင်များကို စစ်ကောင်စီတပ်က ခေါ်ယူစစ်ဆေးပြီး ခြိမ်းခြောက်ဖိအားပေးသောနည်းလမ်းဖြင့်ရွှေဈေးကွက်ကို ထိန်းနေခြင်းဖြစ်သည်။ထိုကြောင့်ရွှေဈေးမှာ ရွှေအသင်းမှ ဖွင့်သောဈေးနှင့် ပြင်ပဈေးကွက်တွင်အမှန်တစ်ကယ်အရောင်းအဝယ်လုပ်သောဈေး ပို၍ကွာဟလာသည်။
ရန်ကုန်တိုင်းရွှေလုပ်ငန်းရှင်များအသင်းက မေ ၄ ရက်ကပြုလုပ်သောအစည်းအဝေးတွင် ရွှေကုန်ကြမ်းမပြတ်လပ်စေရေး ပြည်ပမှရွှေတင်သွင်းရန်ဆောင်ရွက်ရေး၊ စစ်ကောင်စီဗဟိုဘဏ်မှ ရွှေများရောင်းပေးရန် တင်ပြရန်၊ရွှေဆိုင်နှင့် ရွှေကုန်လုပ်ငန်းရှင်များသည် ရန်ကုန်တိုင်းရွှေလုပ်ငန်းရှင်များအသင်းဖွင့်လှစ်သည့် ဈေးနှုန်းထက် ကျပ် ၅၀၀၀ သာခွာ၍ ရောင်းချရန်၊ နယ်မြေဖြတ်ကျော်မရောင်းချရန်နှင့် ရွှေတွင်းလိုင်စင်ရှိသူများနှင့်ရွှေရောင်ဝယ်ကြရန် ဆိုကာ ဆွေးနွေးဆုံးဖြတ်ခဲ့ကြောင်းထုတ်ပြန်ခဲ့သည်။
သို့သော်ဈေးကွက်တွင် ရွှေအသင်းက ဖွင့်သောဈေးမှာ ဖွင့်ဈေးသာရှိပြီး ပြည်ပတွင် ထိုဈေးမှာနည်း၍ ဝယ်ယူမရဖြစ်နေခြင်းဖြစ်သည်။
