'/%3E%3C/svg%3E){kind=small}
အာဏာသိမ်းပြီးနောက် ကရင်နီရိမ်းဂျားလေးဦးထိကျဆုံးခဲ့ဟု အသိပေး
စစ်ကောင်စီတပ်၏ လက်နက်ကြီးကြောင့် ကျဆုံးခဲ့ရသည့် ကရင်နီရိမ်းဂျားအဖွဲ့ဝင် ရဲဘော်ငြိမ်းရန်အေးကို အောက်မေ့သတိရကြောင်း Free Burma Rangers (FBR)အဖွဲ့က ယနေ့ ထုတ်ပြန်လိုက်ပြီး စစ်တပ်အာဏာသိမ်းပြီးနောက်ပိုင်း ကရင်နီရိန်းဂျား လေးဦးကျဆုံးခဲ့ရဟု အသိပေးထားသည်။
ယခုနှစ် ဧပြီ ၁၃ရက်က ဒီးမော့ဆိုမြို့နယ်အတွင်း ဖြစ်ပွားခဲ့သည့်တိုက်ပွဲတွင် Joe John ဟု ခေါ်ဆိုသည့် ရဲဘော် ငြိမ်းရန်အေး(ခ) အငြိမ်းသည် စစ်ကောင်စီတပ်၏ လက်နက်ကြီးကြောင့် ကျဆုံးခဲ့ရသည်ဟု ဆိုသည်။
ရဲဘော် ငြိမ်းရန်အေးသည် ၂ဝ၁၄တွင် Free Burma Rangers (FBR) အဖွဲ့သို့ ဝင်ရောက်ခဲ့ပြီး ၂၀၁၅ တွင် ၎င်း၏ ပထမဆုံးတာဝန်ကို ထမ်းဆောင်ခဲ့ကြောင်း၊ စစ်တပ်အာဏာသိမ်းပြီးနောက် ကရင်နီကျောင်းသား ၂ဝဝကျော်ကို FBR က သင်တန်းပို့ချရာ၌လည်း ရဲဘော် ငြိမ်းရန်အေးက ကူညီပေးခဲ့ကြောင်း ဖော်ပြထားသည်။
Public Service Announcement
Free Burma Rangers အဖွဲ့တွင် တိုင်းရင်းသားလူမျိုးစုံပါဝင်နေပြီး စစ်ဘေးရှောင်များကိုကျန်းမာရေးစောင့်ရှောက်မှုနှင့်ကူညီရေးဆောင်ရွက်ပေးနေသည့် အဖွဲ့အစည်းဖြစ်ကာ နယ်စပ်ဒေသများရှိ တိုင်းရင်းသားလက်နက်ကိုင်အဖွဲ့နယ်မြေများ၌ အဓိက လှုပ်ရှားသည်။
ရဲဘော် ငြိမ်းရန်အေးသည် ကရင်နီအမျိုးသားများကာကွယ်ရေးတပ်(KNDF)တပ်ရင်း(၂)နှင့်အတူ ပါဝင်ဆောင်ရွက်နေပြီး သင်္ကြန်ကလာတိုက်ပွဲ၌ စစ်ကောင်စီတပ်ပစ်ခတ်သည့် လက်နက်ကြီးကျည် ရန်ဘက်ထိမှန်ဒဏ်ရာဖြင့် ကျဆုံးခဲ့ရသည်ဟု ဆိုသည်။
“ဒါဟာ ကျွန်တော်တို့အတွက် ကြီးမားတဲ့ဆုံးရှုံးမှုတစ်ခုဖြစ်ပြီး သိပ်ကိုဝမ်းနည်းကြေကွဲ ရပါတယ်”ဟု ကရင်နီ FBRအဖွဲ့ခေါင်းဆောင်က ပြောကြားကြောင်း FBRက ထုတ်ပြန်သည်။
စစ်ဘေးရှောင် ၂သိန်းခွဲကျော် ထွက်ပြေးနေရသည့် ကရင်နီပြည်နယ်သို့ စစ်ကောင်စီတပ်က ထိုးစစ်ဆင်တိုက်ခိုက်ခဲ့ရာ စစ်ကောင်စီတပ်၏ လက်ချက်ကြောင့် ကရင်နီရိမ်းဂျား လေးဦးကျဆုံးခဲ့ရသည်ဟု ဆိုသည်။
