မြိုင်မြို့နယ်အနောက်ဘက်ခြမ်းသို့ စစ်ကြောင်းထိုးလာသော စစ်ကောင်စီတပ်ကို ပေပါမိုင်းနှစ်လုံး၊ မိုင်းခုနစ်လုံးတို့ဖြင့် တိုက်ခိုက်ခဲ့ကြောင်း အဆိုပါမြို့နယ် ပြည်သူ့ကာကွယ်ရေးတပ်ဖွဲ့က ယနေ့(မေ ၂၇)ထုတ်ပြန်သည်။
ယနေ့နံနက် ၉ နာရီခန့်တွင် မြိုင်မှ ကိုင်းတောမသို့ ထွက်လာသော စစ်ကြောင်းနှင့် ပခုက္ကူမြို့မှ ကိုင်းတောမဘက်သို့ လာသောစစ်ကြောင်း နှစ်ခုကို မိုင်းဆွဲတိုက်ခိုက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြသည်။
အင်အား ၃၀၀ ခန့်ရှိ အဆိုပါစစ်ကြောင်းနှစ်ခုမှာ မိုင်းဆွဲတိုက်ခိုက်ခံရခြင်းကြောင့် ထိခိုက်သေဆုံးများနိုင်ပြီး ထုတ်ပြန်ချက်၌ စာရင်းအတိအကျအား ဖော်ပြထားခြင်းမရှိသေးပေ။
“ဆက်လက်ချီတက်လာပါက အထိတ်တလန့်ဖြစ်စေရန် ပြင်ဆင်ထားရှိပါကြောင်းနှင့် စခ၊ ရခများမှအပြစ်မဲ့ပြည်သူကို သတ်ဖြတ်ခြင်းများရှိနိုင်ပါသဖြင့် ဘေးလွတ်ရာရှောင်ရှားပေးပါရန်သတိပေးထုတ်ပြန်အပ်ပါသည်”ဟု မြိုင်မြို့နယ်ပြည်သူ့ကာကွယ်ရေးတပ်ဖွဲ့က ဖော်ပြသည်။
Public Service Announcement
“မြိုင်မြို့နယ်လေး အဖိခံနေရတယ်။ မြိုင် (ပကဖ)ကော ရှိသမျှ Local PDF လေးတွေကို ထောက်ပံ့ဖို့ တောင်းဆိုပါတယ်။ ဘယ်အဖွဲ့ပဲဖြစ်ဖြစ် ထိရောက်ပါတယ်။”ဟု ဆက်လက် ပြောသည်။
ယနေ့နံနက်ပိုင်းတွင် မြိုင်မြို့နယ်အနောက်ပိုင်းသို့ အင်အား ၂၀၀ ဝန်းကျင်ဖြင့် စစ်ကြောင်းထိုးလာသော စစ်ကောင်စီတပ်များနှင့် ဒေသကာကွယ်ရေးအဖွဲ့များသည် နေ့လယ် ၁နာရီဝန်းကျင်မှ စတင်ကာ တဲကြီးရွာ၊ နယ်သတ်ရွာ အနီးတွင် ထိတွေ့တိုက်ပွဲဖြစ်ပွားခဲ့သည်ဟု ဒေသခံများက ပြောသည်။
အကြမ်းဖက်စစ်ကောင်စီတပ်ဖွဲ့များက မြိုင်နယ်အတွင်းသို့ စနိုက်ပါများ၊ RPG၊ (၆၀) မမ၊ (၁၂၀) မမ များ အသုံးပြုကာ သာလွန်အင်အားဖြင့် ထိုးစစ်ဆင်နေကြောင်း ဒေသခံများက ပြောသည်။
