'/%3E%3C/svg%3E){kind=small}
စစ်ကိုင်းတိုင်း၊ ကောလင်းမြို့နယ်တွင် CDM ဆရာ၊ဆရာမ ၃၀၀ ကျော်ဖြင့် ကျောင်သား၊ ကျောင်းသူ ၁၀,၀၀၀ကျော်ကို ပညာသင်ကြားရေးအစီအစဥ်များစတင်နေပြီဖြစ်ကြောင်း ကောလင်းမြို့နယ် ပညာရေးဘုတ်အဖွဲ့ က ယနေ့(မေ ၂၈ ရက်) အသိပေးထုတ်ပြန် သည်။
“မြို့ပေါ်လောက်ပဲ ကျွန်တော်တို့ မလွှမ်းခြုံနိုင်သေးတာ။ကျေးရွာတွေဘက်မှာတော့ သင်ကြားရေး အစီအစဥ်တွေ အခုလ တတိယပတ်ကစ နေပြီ”ဟု ကောလင်းမြို့နယ် ပညာရေးဘုတ်အဖွဲ့တာဝန်ရှိသူက လူထုနွေဦးသို့ ပြောသည်။
ထို့အပြင် မြို့နယ်တွင်းရှိ စာသင်ကျောင်း ၁၁၃ကျောင်းကို အင်အားဖြည့်တင်းနိုင်ရန် စေတနာ့ဝန် ထမ်းဆရာ၊ ဆရာမ များ ၁,၀၀၀ ကျော်ကိုလည်း သင်ကြားရေး သင်တန်းများပေးနေသည်ဟု ဆိုသည်။
သင်ကြားရေးပိုင်းတွင် အမျိုးသားညီညွတ်ရေးအစိုးရ (NUG)၏ ပြည်သူ့ ပညာရေးအစီအစဥ် တိုင်းဆောင်ရွက်နေပြီး ကျောင်းသုံးပုံနှိပ်စာအုပ်များရရှိရေးနှင့် ရေရှည် တည်တံ့နိုင်ရန် ဘဏ္ဍာငွေ လိုအပ်ချက်အချို့ရှိကြောင်းလည်း အထက်ပါတာဝန်ရှိသူက အသိပေးသည်။
Public Service Announcement
အကြမ်းဖက်စစ်ကောင်စီက အာဏာသိမ်းထားချိန်တွင် NUG က ဦးဆောင်၍ ကြားကာလပညာ ရေးအတွက် အွန်လိုင်းအခြေပြု သင်ကြားရေးအပြင် ပြည်သူအခြေပြုသင်ကြားရေးကို ပိုမို လုပ်ဆောင်လာနိုင်ခဲ့သည်။
အထူးသဖြင့် စစ်ကိုင်း၊မကွေး၊ချင်း နှင့် ကရင်နီ(ကယား)ပြည်နယ်တို့တွင် ပြည်သူအခြေပြုသင်ကြားရေးများမြင့်တက်လာသည်။
ထို့အပြင် စစ်ကျွန်ပညာရေးတွင် ပါဝင်ခြင်းမရှိသော ကျောင်းသားများနှင့် ကျောင်းသားမိဘများကို ကျေးဇူး တင်ကြောင်း ပညာရေးအင်အားစုများက စုပေါင်း၍ ယမန်နေ့တွင် ထုတ်ပြန်ထားသည်။
ပြီးခဲ့သည့် ၂၀၂၁ ခုနှစ်ဖေဖော်ဝါရီ ၁ရက် စစ်တပ်အာဏာသိမ်းချိန်တွင် CDM ပြုလုပ်ခဲ့ကြသော ပညာရေးဝန်ထမ်းများနှင့် ကျောင်းသားကျောင်းသူများ၏ အင်ပြည့်အားပြည့်ပါဝင်မှုကြောင့် စစ်ကောင်စီ၏အရှိုက်ကိုထိုးနှက်သကဲ့သို့ ရှိခဲ့ကြောင်းထောက်ပြသည်။
