စစ်ကိုင်းနှင့်မကွေးတိုင်းဒေသ အချို့တွင်ယနေ့ (မေ ၂၈ ရက်) ည ၁၂ နာရီမှစ၍ ဖုန်းလိုင်းနှင့် အင်တာနက်လိုင်းများပြတ်တောက်သွားသည်။
စစ်ကိုင်းတိုင်းနှင့်မကွေးတိုင်းရှိ မြို့နယ် ၉ခု တွင် မေ ၂၈ ရက် ည ၁၂ နာရီမှ မေ ၂၉ ညနေ ၄နာရီအထိ အင်တာနက်လိုင်းနှင့်ဖုန်းလိုင်းများဖြတ်တောက်မည်ဟု သတင်းများယနေ့ည တွင် ပျံ့နှံပြီး နာရီပိုင်းအကြာတွင် ဒေသအချို့တွင် လိုင်းများပြတ်တောက်သွားခြင်းဖြစ်သည်။
“စစ်ကိုင်းတိုင်း၊ မုံရွာမြို့နယ်၊ မုံရွာ-အမြင့်လမ်းနယ်တွင် ယနေ့ည ၁၁နာရီ၄၂မိနစ်မှစ၍ MPT internetလိုင်းများ ဖျတ်တောက်သွားပြီး ဖုန်းလိုင်းလည်း အနည်းငယ်သာကောင်းကြောင်း သိရှိရပါတယ်။”ဟု မုံရွာအမြင့်လမ်းသတင်းမှန်ပြန်ကြားရေး က သတင်းထုတ်ပြန်ထားသည်။
ဂန်ံ့ဂေါမြို့၊ ယောဒေသအချို့တွင် လည်း ည ၁၂ နာရီခန့်ကစတင်ပြီး အင်တာနက်လိုင်းများ ပြတ်တောက်နေပြီး ဖုန်းလိုင်းတချို့လည်း အဆက်အသွယ်ပြတ်တောက်နေသည်ဟု ထိုဒေသကို အဆက်အသွယ်ပြုလုပ်ခဲ့သူတစ်ဦးကပြောသည်။
ဆက်သွယ်ရေးကုမ္ပဏီအချို့ထံမှသိရသောသတင်းအရ ယနေ့ညမှစ၍ မေ ၂၉ ရက် ညနေအထိ့ အင်တာနက်နှင့် ဖုန်းလိုင်းဖြတ်တောက်မည်ဆိုသော မြို့နယ်များမှာ စစ်ကိုင်းတွင် မုံရွာ၊ ကနီ၊ ပုလဲ၊ ယင်းမာပင်နှင့်ဆားလင်းကြီး ၊ မကွေးတိုင်းတွင် မြိုင်၊ ရေစကြို၊ ဂန့်ဂေါနှင့်ပေါက်မြို့နယ်တို့တွင်ဖြစ်သည်ဟုသတင်းပျံ့နှံနေသည်။
မေလ ၂၄ ရင်တွင်လည်း စစ်ကောင်စီတပ်က စစ်ကိုင်းတစ်တိုင်းလုံးကိုဖုန်းနှင့်အင်တာနက်လိုင်းများကိုဖြတ်တောက်ခဲ့သေးသည်။ဧပြီလကုန်ပိုင်းမှ စ၍ စစ်ကိုင်းတိုင်းတွင် မုံရွာ၊ရွှေဘို ၊စစ်ကိုင်း၊ကလေး မြို့မှ အပ ကျန်ဒေသအားလုံးတွင်အင်တာနက်လိုင်းများဖြတ်တောက်၍ စစ်ကောင်စီတပ်က စစ်ကိုင်းတိုင်းတွင် ပြည်သူများကိုသတ်ဖြတ်ပြီး နေအိမ်ပေါင်းထောင်ရှိမီးရှို့ဖျက်ဆီးနေခြင်းဖြစ်သည်။
စစ်ကောင်စီက ဖုန်းလိုင်းနှင့်အင်တာနက်လိုင်းများကို စစ်ကိုင်း၊ချင်း၊မကွေး၊ကချင် စသောဒေသများတွင် မကြာခဏဖြတ်တောက်နေသည်။ထိုသို့လိုင်များဖြတ်တောက်ပြီး စစ်ကောင်စီတပ်သည် ထိုဒေသများမှ ပြည်သူများအပေါ်အကြမ်းဖက်မှုများပိုမို့ ပြုလုပ်လေ့ရှိသည်။