ကလေးမြို့၊ တာဟန်းရပ်ကွက်အတွင်း စစ်ကောင်စီတပ်က ယမန်နေညတွင် လက်နက်ကြီးဖြင့် ရမ်းသမ်းပစ်ခတ်မှုကြောင့်စစ်ဘေးရှောင်မိသားစုဝင် ၃ ဦး သေဆုံးသွားကြောင်း ကလေးမြို့ခံများက ပြောသည်။
ယမန့်နေ့(မေ ၂၈ ရက်) ည ၇နာရီခန့်က ကလေးမြို့တွင် တိုက်ပွဲဖြစ်ပွားပြီးသေနတ်ပစ်ခတ်သံများ တရစပ်ထွက်ပေါ်လာပြီးနောက် စစ်ကောင်စီတပ်မှ လက်နက်ကြီးများဖြင့် လူနေရပ်ကွက်များသို့ရမ်းသန်း ပစ်ခတ်ခဲ့ခြင်းဖြစ်သည်။ စစ်ကောင်စီ၏ ဂိတ်စခန်းများကို တော်လှန်ရေးအဖွဲ့များကဝင်ရောက်တိုက်ခိုက်ပြီး တိုက်ပွဲဖြစ်ပွားခဲ့ခြင်းဖြစ်သည်။
တိုက်ပွဲဖြစ်ပွားပြီးနောက်စစ်ကောင်စီတပ်က လက်နက်ကြီးပစ်ခတ်မှုများကြောင့် ကလေးမြို့၊ တာဟန်းရပ်ကွက်၊ မေတ္တာ(Agape) ဆေးရုံအနောက်ဖက် ကပ်ရပ် နေအိမ်သို့ လက်နက်ကြီးကျည်ကျရောက်ခဲ့ပြီး တစ်မိသားစုတည်းမှအသက် ၄၅ နှစ်အရွယ်မိခင်နှင့် အသက်၂၅ နှစ်အရွယ်သမီး ၊အသက် ၂၇ နှစ်အရွယ်ရှိသမက် တို့ ကွယ်လွန်ခဲ့သည်။ အသက် ၂၇ နှစ်အရွယ်အမျိုးသားနှင့် အသက် ၂၅ နှစ်အရွယ် အမျိုးသမိး တို့၏ ဇနီးမောင်နှံတွင် ခြောက်လအရွယ်ကလေးငယ်တစ်ဦး ကျန်ရစ်ခဲ့သည်။
“မင်းကင်းဘက်ကနေ စစ်ဘေးရှောင်ပြီး ကလေးမြို့ကိုရောက်နေတာ တစ်အိမ်ထဲမှာသုံးယောက်လုံးသေတာ။”ဟု ကလေးမြို့ခံတစ်ဦးက People’s Springသို့ပြောသည်။
Public Service Announcement
ထိုအပြင်ရပ်ကွက် အတွင်းလက်နက်ကြီးကျပြီး မပေါက်ကွဲသေးသော ကျည်ဆံတစ်ခုကျန်ရှိနေသေးကြောင်းလည်း မြို့ခံတစ်ဦးကပြောသည်။
ထိုအတူ ကလေးမြို့၊တောင်ဖီလာတောင်ပေါ်တွင် တပ်စွဲထားသည့် စစ်ကောင်စီတပ်က စက္ကန့်ကျေးရွာထဲသို့ လက်နက်ကြီးများဖြင့် ပစ်ခတ်မှုကြောင့် ကလေးမိခင်တစ်ဦး ညာဘက်လက်ပြတ်သွားခဲ့သည်ဟု ဒေသခံများကပြောသည်။
ကလေးမြို့ပေါ်တိုက်ခိုက်မှုများဖြစ်ပြီးနောက် ယမန်နေ့ည ည ၁၂ နာရီတွင် စန်းမြို့ရပ်ကွက်ရှိ အ.ထ.က (၈ ) ကျောင်းဆောင်မီးလောင်ခဲ့ကြောင်းလည်း ဒေသခံများထံမှ သိရသည်။
လက်ရှိတွင် ကလေးမြို့တွင် လျှပ်စစ်မီးများကိုလည်း စစ်ကောင်စီက ဖြတ်တောက်ထားသည်ဟု ဒေသခံများကပြောသည်။
