စစ်ကိုင်းတိုင်း ကန့်ဘလူမြို့နယ် မင်းကုန်း(ခ)ရွာမှ အမျိုးသားဒီမိုကရေစီအဖွဲ့ချုပ်(NLD) ရပ်/ကျေးဥက္ကဋ္ဌ ဦးညွန့်ဝင်းနိုင်၏ နေအိမ်ကို တစ်ရွာတည်းနေ ပျူစောထီးများက ဖျက်ဆီးပြီး နွားနှစ်ကောင်ကိုလည်း ဖမ်းဆီးယူဆောင်သွားကြောင်း ကာယကံရှင် ဦးညွန့်ဝင်းနိုင်က ပြောကြားသည်။
အိမ်ခြေ ၂၀၀ကျော်ရှိသည့် အဆိုပါရွာတွင် NLD ပါတီအားပေးသူနှင့် ပြည်ခိုင်ဖြိုးပါတီအားပေးသူ ထက်ဝက်ခန့်စီရှိရာ အာဏာသိမ်းပြီးနောက်ပိုင်း စစ်ကောင်စီတပ်က ပြည်ခိုင်ဖြိုးပါတီဝင်များကို သင်တန်းပေးပြီး လက်နက်တပ်ဆင် (ပျူစောထီးအဖြစ်ဖွဲ့စည်း) ပေးထားသည်ဟု ဆိုသည်။
“ကျွန်တော်တို့ကျတော့ ရွာမှာ စစ်တပ်က မနေနိုင်အောင်လုပ်တော့ ကျွန်တော်တို့က ထွက်ပြေးရတာ။ မိသားစုလိုက်။ မိန်းမကလည်း CDM ဆိုတော့ ပြီးတော့ ကျွန်တော်က NLD ဘက်က အိမ်ကလည်း ရုံးဆိုတော့ အဲဒါ အိမ်ကို ရိုက်ဖျက်တယ် ပစ္စည်းတွေ အကုန်ယူတယ်။ အဲဒီလို ယူသွားပြီးတော့ ကျွန်တော်က မိသားစုလိုက်ဘေးထွက်သွားတဲ့အခါ တူလေးတွေကို လယ်တွေ ဘာတွေလုပ်ရစ် ကျတော့ဆိုပြီး ပစ်ထားခဲ့ရတာပေါ့။နွားတွေလည်း စောင့်ရှောက်ဖို့ထားခဲ့တာ။ နွားတွေကို အဓမ္မ အတင်းလုပြီး ဝင်ယူပြီး ရောင်းစားပစ်လိုက်ကြတာပေါ့” ဟု ဦးညွန့်ဝင်းနိုင်က ပြောသည်။
ထို့ပြင် ကျေးရွာအတွင်းရှိ NLDအားပေးသူများထံမှ ငွေကြေးကောက်ခံမှုများ လုပ်ဆောင်နေကြောင်းလည်း ၎င်းက ဆိုသည်။
Public Service Announcement
“ဘာအတွက်ဆို သူတို့ သပ်သပ်အနိုင်ကျင့်တဲ့သဘော။ တစ်အိမ်တစ်သိန်းပေး ရန်ပုံငွေလိုလို ဘာလိုလိုနဲ့”ဟု ဦးညွန့်ဝင်းနိုင်က ပြောသည်။
ပျူစောထီးများသည် စစ်ကောင်စီတပ်များနှင့် အတူပူးပေါင်းပြီး စစ်ကိုင်းနှင့် မကွေးတိုင်းရှိ မြို့နယ်များအတွင်း စစ်ကြောင်းထိုးခြင်း၊ ပြည်သူလူထုနေအိမ်များကို မီးရှို့ဖျက်ဆီးခြင်း၊ ပစ္စည်းများ ယူဆောင်ခြင်းများ လုပ်ဆောင်ခဲ့သည်။
