ရွာလုံးကျွတ်မီးရှို့ခံ​ရ​သော ​ချောင်းဦးမြို့နယ်၊ မကျည်းတန်းရွာအ​ရေးပေါ်အကူအညီများလိုအပ်​နေ

အကြမ်းဖက်စစ်တပ်၏ ရွာလုံးကျွတ် မီးရှို့ဖျက်ဆီးခြင်းခံခဲ့ရသည့် စစ်ကိုင်းတိုင်း၊ ချောင်းဦးမြို့နယ်၊ မန်ကျည်းတန်းကျေးရွာတွင် ပြည်သူများ မီးလောင်ပြင်၌ တဲထိုး​ကာနေထိုင်နေရပြီး အခြေခံစားကုန်နှင့်လူသုံးကုန်များ လိုအပ်နေကြောင်း ဒေသခံများက ပြောသည်။

ဇွန်လ ၁၀ ရက်နေ့ ​ညနေ ၄ နာရီခန့်က အကြမ်းဖက်စစ်တပ်သည် မန်ကျည်းတန်းကျေးရွာထဲသို့ဝင်ရောက်လာပြီး ညအိပ်စခန်းချခဲ့သည်။ နောက်တစ်နေ့ ဇွန်လ၁၁ ရက်နေ့နံနက် ၆ နာရီခန့်မှစတင်ကာ မီးရှို့ဖျက်ဆီးသွားခဲ့ခြင်းဖြစ်ကြောင်း ဒေသခံများက ပြောသည်။

အကြမ်းဖက်စစ်တပ်၏ မီးရှို့ဖျက်ဆီးမှုကြောင့် တစ်ရွာလုံး အိမ်နှစ်လုံးသာကျန်ခဲ့ပြီး ရွာလုံးကျွတ်မီးလောင်ကျွမ်းပျက်စီးခဲ့ကြောင်း၊ ရွာသူရွာသားများမှာ နေထိုင်စားသောက်ရေးအတွက် အခက်အခဲများနှင့် ရင်ဆိုင်နေရကြောင်း ဒေသခံများကပြောသည်။

“အစားအသောက်ဆိုတဲ့နေရာမှာ အဓိကက ဆီ ၊ဆား၊ဆန် အဲဒါမျိုး အခြေခံဟာတွေလိုအပ်နေပါတယ်။ နောက်ပြီး သူတို့အတွက် ရံပုံငွေလဲလိုတယ်​ဗျ။ ဆေးဝါးပိုင်းဆိုင်ရာတွေအတွက်ပေါ့။ အဓိက လူအသုံးကုန်အခြေခံတွေလိုတာဗျ။ အခုက မီးလောင်ပြင်ကြီးထဲမှာ တဲထိုးပြီး ဖြစ်သလိုနေနေရတဲ့အခြေနေမို့ပါ။”ဟု ​ဒေသခံတစ်ဦးက ပြောသည်။

Public Service Announcement

အကြမ်းဖက်စစ်တပ်သည် မန်ကျည်းတန်းကျေးရွာအပြင် ချောင်းဦးမြို့နယ်အတွင်းရှိ ဘလွေကျေးရွာ၊ တောကျောင်းကြီးကျေးရွာ၊ တောကျောင်းလေးကျေးရွာတို့ကိုပါ မီးရှို့ဖျက်ဆီးမှုများ ပြုလုပ်ခဲ့ကြသည်။

အကြမ်းဖက်စစ်တပ်သည် ဇွန်လ ၁၄ ရက်နေ့က ချောင်းဦးမြို့နယ်၊ တောကျောင်းလေးကျေးရွာတွင် ပြည်သူ၄ဦးအား အရှင်လတ်လတ်နောက်ပြန်ကြိုးတုပ်ကာ မီးရှို့သတ်ဖြတ်သွားကြောင်း၊ ထိုနေ့တွင်ပင် အကြမ်းဖက်စစ်တပ်အားပြည်သူ့ကာကွယ်ရေးအဖွဲ့များက တိုက်ခိုက်ခဲ့ရာ ပျူစောထီး (၆)ဦး သေဆုံးခဲ့ကြောင်း ChaungU Revolution က ထုတ်ပြန်ထားသည်။

စစ်ကိုင်းတိုင်းအတွင်း ၂၀၂၁ ခုနှစ်၊ ဖေဖော်ဝါရီလ (၁) ရက်နေ့မှ ၂၀၂၂ ခုနှစ်၊ မေလ (၃၁) ရက်အတွင်း အကြမ်းဖက် စစ်ကောင်စီတပ်နှင့် လက်အောက်ခံအဖွဲ့အစည်းများက မီးရှို့ဖျက်ဆီးခဲ့၍ လူနေအိမ်ပေါင်း ၁၃၈၄၀ ခန့် မီးလောင်ကျွမ်းပျက်စီးခဲ့သည်။