ရေတာရှည်မြို့နယ် ဒေါင့်အင်းကုန်းကျေးရွာအတွင်းမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေကို ပြီးခဲ့တဲ့ရက်ပိုင်းက ပြည်သူ့ကာကွယ်ရေးပူးပေါင်းအဖွဲ့တွေ တိုက်ခိုက်လို့ စစ်ကောင်စီတပ်သားလေးဦး သေဆုံးသွားခဲ့တယ်လို့ ရေတာရှည်ပြည်သူ့ကာကွယ်ရေးတပ်ဖွဲ့ခွဲ ၂ က သတင်းထုတ်ပြန်ပါတယ်။
ရေတာရှည်မြို့နယ် စစ်တောင်မြစ်အရှေ့ဘက်ကမ်း ဒေါင့်အင်းကုန်းကျေးရွာအုပ်စု ဒေါင့်အင်းကုန်းကျေးရွာမှာ တပ်စွဲထားတဲ့ အင်အား(၅၀)ခန့်ရှိတဲ့ စစ်ကောင်စီတပ်ကို ပြီးခဲ့တဲ့ဇွန် ၁၅ ရက် ည ၆ နာရီအချိန်ခန့်က ရေတာရှည်မြို့နယ် ပြည်သူ့ကာကွယ်ရေးရှားလော့တပ်ဖွဲ့နဲ့ သံတောင်မြောက်ပိုင်းအထူးဒေသ(NTDF) ပူးပေါင်းအဖွဲ့တွေက ဝင်ရောက်တိုက်ခိုက်ခဲ့တာဖြစ်ပြီး စစ်ကောင်စီဘက်က ၄ ဦးသေဆုံးသွားတာဖြစ်ပါတယ်။
ဇွန် ၁၆ ရက်နေ့ ညနေပိုင်းမှာလည်း ပူးပေါင်းတပ်ဖွဲ့တွေက စစ်တောင်းမြစ်အရှေ့ဘက်ကမ်း နယ်မြေစိုးမိုးရေးအတွက် ပိတောက်ကုန်းကျေးရွာအုပ်စု ရေတာရှည်လေးကျေးရွာမှာ လှည့်လည်အင်အားပြပြီး တညအိပ်စခန်းချခဲ့တယ်လို့ ထုတ်ပြန်ချက်မှာဖော်ပြထားပါတယ်
ဒါ့အပြင် ဇွန် ၁၇ ရက်နေ့ မနက်ပိုင်းကလည်း နဂျပ်၊ စည်ပိုင်း၊ ရှမ်းစု၊ ကျွန်းကုန်၊ ပိတောက်ကုန်းကျေးရွာတွေကို သွားရောက်ပြီး စည်းရုံးရေးတွေပြုလုပ်ခဲ့ကာ စစ်ကောင်စီက လာရောက်နိုင်ခြင်းမရှိတဲ့အထိ နယ်မြေစိုးမိုးမှုပြုလုပ်နိုင်ခဲ့တယ်လို့ ရေတာရှည်ပြည်သူ့ကာကွယ်ရေးတပ်ဖွဲ့က ဆိုပါတယ်။
Public Service Announcement
စစ်တောင်းမြစ်အရှေ့ဘက်ကမ်းမှာနေထိုင်တဲ့ ပြည်သူတွေအနေနဲ့ စစ်ကောင်စီတပ်ဖွဲ့ဝင်တွေရဲ့ အနီးတဝိုက်မှာ သွားလာတာတွေမပြုလုပ်ကြဖို့ ရေတာရှည်မြို့နယ် ပြည်သူ့ကာကွယ်ရေးတပ်ဖွဲ့က အထူးမေတ္တာရပ်ခံထားတယ်လို့ ထုတ်ပြန်ထားချက်အရ သိရပါတယ်။
