မကွေးတိုင်းဂန့်ဂေါမြို့နယ်တွင်စစ်ကောင်စီတပ်စစ်ကြောင်းကချန်ထားသည့် ဗုံးသီးပေါက်ကွဲ၍ယမန်နေ့က အသက် ၇ နှစ်အရွယ် ကလေးငယ် နှစ်ဦး အသက်ဆုံးရှုံးခဲ့ရသည်။
ဂန့်ဂေါမြို့နယ်ကန်ရွာအနောက်ဘက်ကျောက်ဂူတောရတောင်ဘက်တောတိုက်တစ်နေရာတွင် စစ်ကောင်စီတပ်စစ်ကြောင်းထိုးစဉ်က ရည်ရွယ်ချက်ရှိရှိ ချန်ထားခဲ့သည့် ၄၀ မမ ဗုံးသီး ယမန်နေ့ ဇွန်လ ၁၉ရက် ညနေပိုင်းပ ပေါက်ကွဲခဲ့၍ အသက်၇နှစ်အရွယ်စီဖြစ်သောမောင်ပြည့်စုံမောင် နှင့် မောင်မင်းထွဋ်ဇော တို့အသက်ဆုံးရှုံးခဲ့ရသည်ဟုဂန့်ဂေါ ပြည်သူ့ကာကွယ်ရေးတပ်(PDF)က ထုတ်ပြန်သည်။
ပြည်သူများ အနေဖြင့် စစ်ကောင်စီတပ်က တောတိုက်များအတွင်း၌ သော်လည်းကောင်း၊ကျေးရွာများအတွင်း၌သော်လည်းကောင်း ရည်ရွယ်ချက်ရှိရှိချန်ထားခဲ့သည်ဖြစ်စေ၊ ကျန်ရစ်ခဲ့သည်ဖြစ်စေ၊ယင်းတို့ပစ်ခတ်စဉ် မပေါက်ကွဲ၍ဖြစ်စေကျန်ရစ်ခဲ့သော ဗုံးသီးများနှင့် အန္တရာယ် ရှိသည့်ပစ္စည်းများ အားတွေ့ရှိပါက ကိုင်တွယ်ခြင်းများမပြုလုပ်ကြပါရန်ဂန့်ဂေါ PDFကသတိပေးထားသည်။
ထို့အပြင် ကလေးမိဘများအနေဖြင့်လည်း မိမိတို့၏ကလေးများအား ဗုံးသီးများကိုင်တွယ်ကစားခြင်းများမပြုကြရန်အထူးမှာကြားထားရန် လိုအပ်ပြီး ဗုံးသီးများ တွေ့ရှိပါက မြို့နယ် အတွင်းရှိကာကွယ်ရေးအဖွဲ့များသို့ချက်ချင်းအသိပေးအကြောင်းကြားပေးကြရန် ထုတ်ပြန်ခဲ့သည်။