ကရင်အမျိုးသားအစည်းအရုံး(KNU) တပ်မဟာ (၅) နယ်မြေ ဖာပွန်ဒေသ ရှေ့တန်း၌ ရောက်ရှိနေသည့် စစ်ကောင်စီတပ်မှ တပ်သား ၆ဦးသည် ဖာပွန်မှ ဘီးလင်းမြို့နယ်သို့ ထွက်ပြေးလာပြီး KNU တပ်မဟာ(၁)၊ တပ်ရင်း(၃)တပ်ဖွဲ့ဝင်များထံခိုလှုံလာကြောင်း တပ်မဟာ (၁) တာဝန်ရှိသူတစ်ဦးက ပြောသည်။
“၂၀ရက်နေ့က စကခ(၈)က ၄၀၃ ရဲဘော် ၆ယောက်က လက်နက်မဲ့နဲ့ ထွက်ပြေးတယ်။ ထွက်ပြေးတော့ ကျွန်တော်တို့ဆီရောက်လာတယ်။သူတို့တွေကတော့ လုံခြုံတဲ့နေရာမှာ ပို့ထားလိုက်ပြီပေါ့။သူတို့ ကျန်းမာရေးအခြေအနေက ကောင်းတယ်။ လုံခြုံတဲ့နေရာမှာ ပဲရှိနေတယ်”ဟု ၎င်းက ဆိုသည်။
အဆိုပါ စစ်ကောင်စီတပ်သား ၆ဦးသည် ဖာပွန်နယ်မှ ဘီးလင်းဘက်သို့ထွက်ပြေးလာခဲ့ခြင်းဖြစ်သည်ဟု ပြောသည်။
“ရှေ့တန်းရောက်နေတဲ့ တပ်တွေက ထွက်ပြေးလာတာ။ ထွက်ပြေးလာတော့ ကျွန်တော်တို့နဲ့ ဆက်သွယ်ပြီးတော့ ရောက်လာတယ်။ ကျွန်တော်တို့ တပ်ရင်း(၃)ဘက်ကိုရောက်လာတာပေါ့”ဟု တပ်မဟာ(၁)တာဝန်ရှိသူက ပြောသည်။
Public Service Announcement
KNU တပ်မဟာ(၅)နယ်မြေတွင် နယ်မြေခံ KNUတပ်ဖွဲ့ဝင်များက စစ်ကောင်စီတပ်များကို မကြာခဏ တိုက်ခိုက်လျက်ရှိပြီးစစ်ကောင်စီတပ်မှ သေဆုံးထိခိုက်များပြားလျက်ရှိသည်။ တိုက်ပွဲများ၌ စစ်ကောင်စီတပ်က အကျအဆုံး အထိအခိုက်များသကဲ့သို့ စစ်ကောင်စီတပ်ဖွဲ့ဝင်များ အရှင်ဖမ်းမိခြင်း၊တပ်မှ ထွက်ပြေးပြီး CDM ပြုလုပ်ခြင်းများ မကြာခဏ ဖြစ်ပေါ်လျက်ရှိကြောင်း KNUတပ်မဟာ(၅)၏ ထုတ်ပြန်ချက်များ၌ တွေ့ရသည်။
