အမေရိကန်ကုမ္ပဏီ Dacast သည် မြန်မာစစ်တပ်ဝါဒဖြန့်ရုပ်သံ MRTV ၏ တိုက်ရိုက်ထုတ်လွှင့်ခြင်းအစီအစဉ်ကိုပိတ်ပင်လိုက်ကြောင်း Justice For Myanmar က ယနေ့ထုတ်ပြန်သည်။
တရားမဝင်မြန်မာစစ်တပ်က ထိန်းချုပ်ထားသော MRTV သည် ဝဘ်ဆိုက်နှင့် မိုဘိုင်းအက်ပလီကေးရှင်းများပေါ်တွင် တိုက်ရိုက်ထုတ်လွှင့်ပြသခြင်းကို အမေရိကန်၊ ကယ်လီဖိုနီးယားအခြေစိုက် Dacast ၏ နည်းပညာကို အသုံးပြုခြင်းဖြစ်ပြီး Dacast က ၎င်းတို့၏ ဝန်ဆောင်မှုကို MRTV အား အသုံးပြုခွင့်မပေးတော့ခြင်းဖြစ်သည်။
မြန်မာစစ်တပ်သည် အမုန်းစကားနှင့် သတင်းမှားများကို ဖြန့်ချိထုတ်လွှင့်ရန် MRTV ကို အသုံးချနေခြင်းလည်းဖြစ်သည်။
ထို့အတွက် မြန်မာစစ်တပ်သည် Ducats ၏နည်းပညာကို အသုံးချနေသည့်အကြောင်း Justice For Myanmar က ဆက်သွယ်သတိပေးခဲ့သည်။
Public Service Announcement
နာရီပိုင်းအကြာတွင် MRTV ဝဘ်ဆိုက်နှင့် အက်ပလီကေးရှင်းများတွင် ပိတ်ပင်ခံရကြောင်းစာသားကို တွေ့ရှိရကြောင်း Justice For Myanmar က ထုတ်ပြန်သည်။
ပြီးခဲ့သည့် မေလက အာဏာသိမ်းစစ်ခေါင်းဆောင် မင်းအောင်လှိုင်ကိုယ်တိုင် တက်ရောက်ဖွင့်လှစ်ပေးခဲ့သော MRTV အက်ပလီကေးရှင်းများကို App Store နှင့် Google Play တို့က ၎င်းတို့၏ ပလက်ဖောင်းမှ ဖယ်ရှားခဲ့သည်။
သို့သော် ဝဘ်ဆိုက်ကို ဒိုမိန်းအသစ်ဖြင့် ပြန်လည်လွှင့်တင်ခဲ့ပြီးနောက် အဆိုပါ အက်ပလီကေးရှင်းများကို App Store နှင့် Google Play တို့၌ ပြန်လည်မြင်တွေ့ရသည်။
