ကျောက်ကြီးတွင် စစ်ကောင်စီတပ်ကို KNU၊PDF ပူးပေါင်းတပ်က မိုင်း ၁၀လုံးဖြင့်ကြားဖြတ်တိုက်ခိုက်၊ စစ်ကောင်စီတပ် သေဆုံးထိခိုက်ရှိ

ကရင်အမျိုးသားအစည်းအရုံး(KNU) ညောင်လေးပင်ခရိုင် တပ်မဟာ(၃)နယ်မြေ ကျောက်ကြီးမြို့နယ်တွင် စစ်ကောင်စီတပ်ကို KNUနှင့် ပြည်သူ့ကာကွယ်ရေးတပ် (PDF) ပူးပေါင်းတပ်က ကြားဖြတ်တိုက်ခိုက်ခဲ့ကြောင်း KNU-PDFကျောက်ကြီးက သတင်းထုတ်ပြန် သည်။

ယနေ့ (ဇူလိုင် ၁၄ ရက်)နံနက်ပိုင်းက ကျောက်ကြီးမြို့ နယ်၊ တောကြောင်ပေါက်ရွာအနီး၌ စစ်ကောင်စီ၏ တပ်မ(၉၉) လက်အောက်ခံတပ်များနှင့် တိုက်ပွဲဖြစ်ပွားခဲ့ပြီး နေ့လည်ပိုင်းတွင် တောကြောင်ပေါက်ရွာမှ ကျောက်စရစ်ရွာသို့ စစ်ကြောင်းထိုးလာသည့် စစ်ကောင်စီတပ်ကို မိုင်း ၁၀လုံးဖြင့် တိုက်ခိုက်ခဲ့သည်ဟုဆိုသည်။

ထိုသို့ တိုက်ခိုက်မှုကြောင့် စစ်ကောင်စီတပ်သားများ သေဆုံးထိခိုက်မှုရှိနေကြောင်း ဖော်ပြထားသည်။

ယခု ဇူလိုင်လဆန်းပိုင်း၌ KNU တပ်မဟာ( ၃)နယ်မြေ ကျောက်ကြီးမြို့နယ်အတွင်းရှိ စစ်ကောင်စီတပ်စခန်း ၅ ခုကို KNU က တစ်ပြိုင်နက်တည်း တိုက်ခိုက်သိမ်းပိုက်ခဲ့သည်။

Public Service Announcement

အဆိုပါ တိုက်ပွဲများ၌ စစ်ကောင်စီတပ်က တပ်ရင်းမှူး အပါအဝင် သေဆုံးထိခိုက်မှုများပြားခဲ့ရာ စစ်ကောင်စီတပ်က လေကြောင်းပစ်ကူများဖြင့်ပါ တိုက်ခိုက်ခဲ့ကြောင်း KNU-PDF ကျောက်ကြီး၏ သတင်းထုတ်ပြန်ချက်၌ ဖော်ပြထားသည်။