စစ်ကိုင်းတွင် ပြည်သူ့ကာကွယ်ရေးရဲဘော်များအား နိုင်ငံရေးအသိများ ပို့ချ

စစ်ကိုင်းတိုင်းဒေသကြီးအတွင်း ကျေးရွာတစ်ရွာရှိ ပြည်သူ့ကာကွယ်ရေးတပ်ဖွဲ့ (ပ.က.ဖ) ရဲဘော်များအား မန္တလေးနှင့် မုံရွာမြို့ သပိတ်ဦးဆောင်သူတချို့က ယနေ့ (သြဂုတ် ၁၆)တွင် နိုင်ငံရေးအသိများ ပို့ချခဲ့သည်။

ယင်းပို့ချမှု​သင်တန်းအား တစ်ရက်တည်း ပြုလုပ်ခဲ့ပြီး တော်လှန်ရေး၌ စစ်ရေး၊ နိုင်ငံရေး ဟန်ချက် ညီညီတွဲ၍ လုပ်ဆောင်ပုံအား ဦးဆောင်ပို့ချခဲ့ကြောင်း မန္တလေး သပိတ်ဦးဆောင်သူ မအေးမြင့်အောင်အောင်က သူမ၏လူမှုကွန်ရက် မှတဆင့် အသိပေးသည်။

” ဒီတစ်ခေါက်မှာလဲ ကျွန်တော်တို့အဖွဲ့များကို ကျေးရွာတစ်ရွာက (ပ.က.ဖ) အဖွဲ့တစ်ဖွဲ့က လာရောက်ဖိတ်ကြားတဲ့အတွက် နိုင်ငံရေးအသိပို့ချခဲ့ပါတယ်။ မုံရွာသပိတ်ဦးဆောင်သူ ကိုခန့်ဝေဖြိုးကလည်း လာရောက်ပြီး တော်လှန်ရေးမှာ စစ်ရေး၊နိုင်ငံ​ရေး ဟန်ချက်ညီညီ တွဲသွားပုံတွေကို ဦးဆောင်ပို့ချခဲ့ပါတယ်။ အချိန်အားဖြင့် တစ်ရက်ပဲ ရတဲ့အတွက် အခြေခံသဘောတရားလောက်ပဲ ပို့ချနိုင်ခဲ့ပါတယ်။ နောက်ပိုင်းတွေမှာ ဒီ့ထက်ပိုပြီးလုပ်ဆောင်နိုင်ဖို့ ဆက်လက်ကြိုးစားသွားကြပါမယ်ဗျို့။ အသိဉာဏ်ပညာဖြင့် တော်လှန်ကြတဲ့ တော်လှန်ရေးတစ်ရပ် ဖြစ်ရပါမယ် ” ဟု မအေးမြင့်အောင်အောင်က ရေးသားထားသည်။

ပြီးခဲ့သည့် ဇူလိုင် နောက်ဆုံးပတ်ကလည်း စစ်ကိုင်းတိုင်း ချောင်းဦးမြို့နယ်တွင် မန္တလေးနှင့် မုံရွာ သပိတ်ဦးဆောင်သူတချို့က ဒေသခံ ပြည်သူ့ကာကွယ်ရေး တပ်ဖွဲ့မှ ရဲဘော်များအား ဖက်ဒရယ်ဝါဒနှင့် နိုင်ငံရေးသင်တန်းများ ပို့ချခဲ့သည်။

Public Service Announcement