မကွေးတိုင်း၊ မြိုင် – ပခုက္ကူလမ်းပိုင်းတွင် အကြမ်းဖက်စစ်ကောင်စီတပ်မှ ဒုဗိုလ်မှူးကြီးတစ်ဦးအား စစ်ဆေးရာ ပြန်လည်တိုက်ခိုက်ထွက်ပြေးသဖြင့် ပစ်ခတ်ဖမ်းဆီးခဲ့ပြီးနောက် သေဆုံးသွားကြောင်း မြိုင်မြို့နယ်ကာကွယ်ရေးတပ်ဖွဲ့က ယနေ့(သြဂုတ် ၂၅ ရက်) ညပိုင်းတွင် သတင်းထုတ်ပြန်သည်။
မြိုင်မြို့နယ်ကာကွယ်ရေးတပ်ဖွဲ့ဝင်များသည် မြိုင် – ပခုက္ကူလမ်းပိုင်းတွင် စစ်ဆေးရေးများပြုလုပ်နေစဉ် ပုံပါ ဒု-ဗိုလ်မှုးကြီးအား တွေ့ရှိ၍ စစ်ဆေးမေးမြန်းနေစဉ် ရဲဘော်များအား ပြန်လည်တိုက်ခိုက်ထွက်ပြေးသဖြင့် ပစ်ခတ်ဖမ်းဆီးရာ ဒဏ်ရာများဖြင့် သေဆုံးသွားခဲ့ခြင်းဖြစ်ကြောင်း မြိုင်(ပ.က.ဖ)၏ ထုတ်ပြန်ချက်တွင် ဖော်ပြသည်။
အခြေအနေ အကြောင်းကြောင်းကြောင့် ဖြစ်ပွားရာ အချိန်များနှင့် တချို့အချက်အလက်များကို ဖော်ပြခြင်းမပြုတော့ပါဖြစ်ကြောင်း သတင်းထုတ်ပြန်အပ်ပါသည်ဟု မြိုင်(ပ.က.ဖ)က အသိပေးသည်။
ဖြစ်စဥ်နှင့်ပတ်သက်ပြီး မြိုင်(ပ.က.ဖ)အဖွဲ့ထံ ဆက်သွယ်မေးမြန်းခဲ့သော်လည်း လက်တလောဆက်သွယ်၍ မရသေးပေ။
Public Service Announcement
စစ်ကောင်စီတပ်၏ ထိခိုက်သေဆုံးမှုအခြေအနေနှင့်ပတ်သက်၍ People’s Springက ထပ်မံအတည်ပြုနိုင်ခြင်းမရှိသေးပေ။
ပြီးခဲ့သည့် သြဂုတ် ၂၀ ရက်ကလည်း မြိုင် – ပခုက္ကူလမ်းပေါ်တွင် စစ်ထောက်လှမ်းရေးတစ်ဦးအား စစ်ဆေးနေစဥ်ထွက်ပြေး၍ ပစ်ခတ်ဖမ်းဆီးခဲ့ရာ သေဆုံးသွားခဲ့သေးသည်။
