ရန်ကုန်တိုင်း ရွှေပြည်သာမြို့နယ် (၂၀)ရပ်ကွက်(သံဒင်း)အုပ်ချုပ်ရေးမှူးရုံးအား ဖောက်ခွဲတိုက်ခိုက်ရန် စီစဥ်ခဲ့သော်လည်း ပြည်သူများရှိနေ၍ တိုက်ခိုက်ရေးအစီအစဥ် ဖျက်သိမ်းခဲ့ရကြောင်း ရွှေပြည်သာမြို့နယ် မြေအောက်တော်လှန်ရေးအဖွဲ့(SPTUG)က ယနေ့(သြဂုတ် ၃၀)တွင် ထုတ်ပြန်သည်။
ပြည်သူများအား ညနက်သန်းခေါင် ဧည့်စာရင်းစစ်ခြင်း၊ PDF ဟုအမည်တပ်ကာ ဖမ်းဆီးစေခိုင်းကာ စစ်တပ်အားကိုးနေသော (၂၀)ရပ်ကွက် (သံဒင်း)ရုံးအား ယနေ့ည ၇ နာရီ ၄၅ ခန့်တွင် ဖောက်ခွဲတိုက်ခိုက်ရန် စီစဥ်ခဲ့ခြင်းဖြစ်ကြောင်း ဖော်ပြသည်။
ထိုသို့ ဖောက်ခွဲတိုက်ခိုက်ရန် စီစဥ်ထားစဥ် အလုပ်မှပြန်လာသော စက်ရုံအလုပ်သမားများနှင့် ပြည်သူများ တိုက်ခိုက်ရေးပြုလုပ်မည့် ဧရိယာအတွင်း ရှိနေချင်းကြောင့် တိုက်ခိုက်မည့်အစီအစဥ် ဖျက်သိမ်းခဲ့ရသည်ဟု ဆိုသည်။
“အဲ့ချိန်က (ရုံးထဲလူ)ရှိတယ်။ ညဘက်တိုင်း ဓါးတွေတုတ်တွေနဲ့ ကင်းပတ်တယ်။ ရုံးမှာ လူစုတယ်။ စစ်တပ်မပါလည်း ဧည့်စစ်တယ်”ဟု (၂၀)ရပ်ကွက်ရုံး အခြေအနေအား SPTUG အဖွဲ့မှ ရဲဘော်တစ်ဦးက ရှင်းပြသည်။
Public Service Announcement
အထက်ပါ စစ်ကောင်စီရပ်ကျေးရုံးအား ဖောက်ခွဲတိုက် ခိုက်ရန် ဗုံးနှစ်လုံးဆင်ထားပြီး တစ်လုံးမှာ ဖောက်ခွဲမည့်ဆဲဆဲတွင် ရပ်ထားခဲ့ရပြီး ကျန်တစ်လုံးမှာ အကောင်းအတိုင်းကျန်ရှိခဲ့ကြောင်း အထက်ပါရဲဘော်က ဆက်ပြောသည်။
ထို့ကြောင့် မပေါက်ကွဲသေးသည့် ဗုံးကျန်ရှိနေသဖြင့် ပြည်သူများအနေဖြင့် (၂၀)ရပ်ကွက်(သံဒင်း)ရုံးအနီးဝန်းကျင်အား ရှောင်ရှားသွားလာကြရန် SPTUG အဖွဲ့က သတိပေးထားသည်။
