ရန်ကုန်မြို့ ရွှေပြည်သာမြို့နယ် ထ/၁၆ ရပ်ကွက်ရာအိမ်မှူး မုန့်ဟင်းခါးစားနေစဥ် သေနတ်ဖြင့် ကိုးချက်ထက်မနည်း ပစ်ခတ်ခံရပြီး သေဆုံးသွားကြောင်း ဒေသခံများက ပြောသည်။
ရာအိမ်မှူးဝင်းဇော်မှာ ယနေ့(သြဂုတ် ၁၉ ရက်)၊ နံနက် ၇နာရီခန့်က ရွှေပြည်သာမြို့နယ် နီလာစျေးအနီးရှိ မုန့်ဟင်းခါးဆိုင်၌ ဇနီးဖြစ်သူနှင့်အတူ ထိုင်စားနေစဥ် ပစ်သတ်ခံရခြင်း ဖြစ်သည်။
“ကျွန်တော်တို့ ထ/၁၆ ရပ်ကွက်က ။စစ်တပ်က သူ့အဖေ လို့ သတ်မှတ်ထားတဲ့ကောင်။ဖအေတွေ အာဏာသိမ်းပြီးတဲ့နောက်အမြဲတမ်း ရပ်ကွက်ထဲ ဆရာကြီးလုပ်နေတဲ့ကောင်”ဟု ဒေသခံတစ်ဦးက ပြောသည်။
ရှင်းလင်းခံရသည့် ရာအိမ်မှူး ဝင်းဇော်၏ ခန္ဓာကိုယ်တွင် စုစုပေါင်း ကျည်ထိဒဏ်ရာ ကိုးချက် အထိ ရှိခဲ့ကြောင်းလည်း ဒေသခံများက ဆိုသည်။
ပစ်ခတ်မှုဖြစ်စဉ်အပြီး စစ်ကောင်စီတပ်က လှော်ကားဘုရားလေး မှတ်တိုင်အား ပိတ်ဆို့ခဲ့ပြီး ဈေးအတွင်းတွင်လည်း စစ်ကားသုံးစီးခန့် ရောက်ရှိလာ၍ ဈေးဆိုင်များလည်းပိတ်ခဲ့ရကြောင်း ဒေသခံသတင်းရင်းမြစ် SPT Information က အသိပေးသည်။
Public Service Announcement
မည်သည့်အဖွဲ့က လာရောက်ပစ်ခတ်ရှင်းလင်းသည်ကို မသိရသေးပေ။
သြဂုတ် ၈ ရက်ကလည်း ရွှေပြည်သာမြို့နယ်၊ အမှတ်(၈)ရပ်ကွက် ရာအိမ်မှူးကိုလည်း ရှင်းလင်းခဲ့ကြောင်း Wolves အဖွဲ့ က ထုတ်ပြန်ထားသည်။
