စစ်ကောင်စီတပ်မှ သေဆုံးသူများ၊ အရှင်ဖမ်းမိသူအချို့ရှိပြီး လက်နက် ၂၀ခန့်ရရှိဟုဆို
ကရင်အမျိုးသားအစည်းအရုံး(KNU) တပ်မဟာ(၆)နယ်မြေ ကော့ကရိတ်မြို့နယ်ရှိ စစ်ကောင်စီ ၏ ကျိတ်စခန်းကို ယနေ့ မွန်းလွဲပိုင်း၌ တိုက်ခိုက်သိမ်းပိုက်ခဲ့ကြောင်း KNU သတင်းရင်းမြစ်က ပြောကြားပြီး စစ်ကောင်စီတပ်မှ သေဆုံးသူများရှိသည်ဟု ဆိုသည်။
စက်တင်ဘာ ၂၀ရက် မွန်းလွဲ ၃နာရီခန့်တွင် တိုက်ခိုက်သိမ်းပိုက်ခဲ့ခြင်းဖြစ်သည်ဟု ဆိုသည်။
“စခန်းသိမ်းတာ အတည်ပြုလို့ရတယ်။ စခန်းတက်သိမ်းပြီးတော့ ပြန်ဆုတ်လာတယ်။ စစ်ကောင်စီအကျအဆုံး အတိအကျတော့ မသိရသေးဘူး။ လက်နက်က ၂၀နီးပါးလောက်တော့ရတယ်။ သူတို့ လူတွေ သေတာတော့ ရှိမှာပေါ့။ အသေးစိတ်အခြေအနေတော့ မသိရသေးဘူး” ဟု KNUသတင်းရင်းမြစ်တစ်ဦးက ပြောသည်။
အဆိုပါ တိုက်ခိုက်မှုကို KNUလက်အောက်ခံ ကရင်အမျိုးသားလွတ်မြောက်ရေးတပ်မတော် (KNLA)နှင့်အတူ ပူးပေါင်းတပ်ဖွဲ့ဖြစ်သည့် ဒေါနစစ်ကြောင်းကလည်း ပါဝင်တိုက်ခိုက်ခဲ့ခြင်းဖြစ်ကြောင်း ကော့ကရိတ်နယ်ရှိ ပြည်သူ့ကာကွယ်ရေးတပ်(PDF)တာဝန်ရှိသူတစ်ဦးက ပြောသည်။ ဖြစ်စဉ်အသေးစိတ်ကို မသိရသေးဟု ၎င်းက ဆိုသည်။
Public Service Announcement
ကရင်တိုင်းရင်းသားတစ်ဦးကလည်း “ အခြေအနေက ဒီလို စခန်းကို မွန်းလွဲ ၃နာရီမှာ သိမ်းလို့ရတယ်။ လက်နက်တွေရတယ်။ သုံ့ပန်းတချို့ ဖမ်းဆီးရမိတယ်”ဟု ပြောသည်။
ကရင်ဒေသသတင်းများ ဖော်ပြလျက်ရှိသည့် Salween Press၏ တိုက်ပွဲသတင်းဖော်ပြချက်တွင် စခန်းသိမ်းတိုက်ပွဲ၌ စစ်ကောင်စီတပ်က ၂၀ကျော်သေဆုံးပြီး အရှမ်ဖမ်းမိသူများ ရှိသည်ဟု ရေးသားထားသည်။
