ရွှေ​ဈေး ၂၆သိန်းအောက်​ရောက်လာပြီးနောက်ရွှေဆိုင်များအရောင်းပိတ်ထား

အခေါက်ရွှေတစ်ကျပ်သားလျှင် ကျပ် ၂၆ သိန်းအောက်ကျဆင်းလာပြီးနောက် ရွှေဆိုင်အားလုံးနီးပါး အရောင်းပိတ်ထားကြောင်း​​ဈေးကွက်အတွင်းမှသိရသည်။

ရွှေဈေးကျဆင်းချိန်တွင် ရွှေရောင်းရန် မရှိဟုဆိုကာ ရွှေဆိုင်များက အရောင်းပိတ်ထားသော်လည်း ပြန်ရောင်းပါက ဝယ်ယူသည်ဟု ယနေ့ ရွှေဝယ်ရန်သွား​ရောက်စုံစမ်းပြီးဝယ်မရခဲ့သူတစ်ဦးကပြောသည်။

“ဆိုင်တွေက စျေးဘဲဖွင့်ပြီးပစ္စည်းမရှိဘူးလို့ပြောတယ်။ ဖြတ်စရွှေတုံးအသေးတွေရောင်းပေးတယ်။ ရွှေတုံးအပိုင်းလိုက်မရောင်းဘူး”ဟု ယနေ့ ရန်ကုန်မြို့တွင် ရွှေဝယ်ရန် ကြိုးစားခဲ့သူတစ်ဦးကလည်းပြောသည်။

​ရွှေဆိုင်များက ပြန်ဝယ်ပြီး မ​ရောင်း​တော့ခြင်းမှာ ယခု​ဈေးမှက်မကျနိုင်​တော့ဘဲ ​ဈေးတက်ရန်သာရှိသည့်အတွက် ဖြစ်နိုင်​ကြောင်း ​​ရွှေဝယ်လို​သော်လည်း ဝယ်မရခဲ့သူအချို့ကသုံးသပ်သည်။

Public Service Announcement

ယနေ့ အခေါက်ရွှေတစ်ကျပ်သားကို ၂,၅၇၀,၀၀၀ကျပ်ဈေးဖွင့်ထား​သော်လည်းအရောင်းပိတ်ထားခြင်းဖြစ်သည်ဟု ရွှေဝယ်လိုသူများကပြောသည်။ ယ​မန်​နေ့(အောက်တိုဘာ ၁၀ ရက်)က အခေါက်ရွှေတစ်ကျပ်သားလျှင် ၂,၆၄၀,၀၀၀ ကျပ်ပေါက်ဈေးရှိခဲ့ရာမှကမ္ဘာ​ရွှေ​ဈေးကျသဖြင့် ကျပ်ခုနှစ်​သောင်းကျပ်ထပ်မံကျဆင်းခဲ့ခြင်းဖြစ်သည်။

ကမ္ဘာ့ရွှေဈေးမှာလည်း အောက်တိုဘာ ၁၁ ရက်က တစ်အောင်စကို ၁၆၆၁ ဒေါ်လာအထိကျဆင်းခဲ့သည်။ ယမန့်နေ့(အောက်တိုဘာ ၁၀ ရက်) တစ်အောင်စကို ဒေါ်လာ ၁၆၉၅ ရှိခဲ့သည်။

စစ်ကောင်စီအလိုကျဆောင်ရွက်ပေးနေသည့် ရန်ကုန်တိုင်းရွှေလုပ်ငန်းရှင်အသင်းက အခေါက်ရွှေတစ်ကျပ်သားကို ၁,၉၆၀,၀၀၀ ကျော်သာဈေးဖွင့်ထားသည်။

စစ်ကောင်စီက ရန်ကုန်တိုင်းနှင့်မန္တလေးတိုင်းတို့တွင် ​ရွှေဝယ်လိုပါကမှတ်ပုံတင် ၊သံ​ခေါင်စာရင်းဖြင့်လူတစ်ဦးလျှင်ရွှေတစ်ဆယ်သားရောင်းပေးမည်ဟု ထုတ်ပြန်ထားသည်။သို့သော်လည်း ထိုရွှေများကို အသင်းများက တာဝန်ရှိသူများနှင့် ၎င်းတို့နှင့်နီးစပ်သူများသာ အများဆုံးဝယ်ယူရခြင်းဖြစ်​ကြောင်းသိရသည်။