စစ်ကောင်စီကို ဖယ်ရှားအရေးယူနိုင်ရေးကူညီပေးရန် ကုလနှင့် နိုင်ငံတကာကို မေတ္တာရပ်ခံ
ကချင်ပြည်နယ်၊ ဖားကန့်မြို့နယ် အနန့်ပ ရှိ တေးဂီတဖျော်ဖြေပွဲကို အကြမ်းဖက်စစ်ကောင်စီက လေကြောင်းတိုက်ခိုက်ခဲ့၍ သေဆုံးထိခိုက်မှုများစွာ ဖြစ်ပေါ်ခဲ့ရခြင်းအပေါ် ကချင်တိုင်းရင်းသားပြည်သူများနှင့်ထပ်တူဝမ်းနည်း ကြေကွဲရကြောင်း အမျိုးသားဒီမိုကရေစီအဖွဲ့ချုပ်(NLD)ပါတီ ဗဟိုအလုပ်ကော်မတီက ထုတ်ပြန်သည်။
အောက်တိုဘာ ၂၃ ရက်ညက အနန့်ပါ လေကြောင်းတိုက်ခိုက်မှုသည် စစ်ကိုင်းတိုင်း၊ ဒီပဲယင်းမြို့နယ်၊ လက်ယက်ကုန်းရွာရှိ စာသင်ကျောင်းတွင် ပညာသင်ယူနေသော လူမမယ် ကျောင်းသား၊ လူငယ်လေးများအား ပစ်မှတ်ထား တိုက်ခိုက်ခဲ့သကဲ့သို့ပင် အရပ်သားပြည်သူများအပေါ် ရည်ရွယ်ချက်ရှိရှိ ကျူးလွန်ခြင်းဖြစ်ကြောင်း ထင်ရှားသည်ဟု ဖော်ပြထားသည်။
ထို့ကြောင့် လူမျိုးတုန်းသတ်ဖြတ်ရန် ရည်ရွယ်သည့် စစ်ရာဇဝတ်မှုကို အကြမ်းဖက်စစ်ကောင်စီက အကြိမ်ကြိမ် ကျူးလွန်နေခြင်းဖြစ်ကြောင်း NLDက ထုတ်ပြန်သည်။
တိုင်းရင်းသား၊ ပြည်သူလူထုများအား အင်အားအလွန်အကျွံသုံး အကြမ်းဖက်သတ်ဖြတ်မှုများကို နေ့စဉ်ကျူးလွန်နေသည့် အကြမ်းဖက်စစ်ကောင်စီကို ဖယ်ရှား၊ အရေးယူနိုင်ရေးအတွက် ကုလသမဂ္ဂ လုံခြုံရေးကောင်စီအပါအဝင် နိုင်ငံတကာအဖွဲ့အစည်းများ၊ ကမ္ဘာခေါင်းဆောင်များ အနေဖြင့် တိုင်းရင်းသား၊ ပြည်သူလူထုနှင့်အတူ ပူးပေါင်းကူညီ ဆောင်ရွက် ပေးရန်NLDက မေတ္တာရပ်ခံ တိုက်တွန်းထားသည်။
Public Service Announcement
