စစ်ကိုင်းတိုင်း၊ မုံရွာနှင့်မြင်းမူမြို့နယ်ရှိ ကျေးရွာနှစ်ရွာကို ယမန်နေ့ညနေပိုင်းက စစ်ကောင်စီတပ် ဝင်ရောက် မီးရှို့ဖျက်ဆီးခဲ့သည်။
ယမန်နေ့(နိုဝင်ဘာ ၃ရက်) နံနက် ၉နာရီခွဲခန့်က စစ်ကောင်စီတပ်သည် မြင်းမူမြို့နယ်၊ ရွှေယင်းမာကျေးရွာသို့ဝင်ရောက်ပြီး နေအိမ်အချို့အား ဝင်ရောက် မွှေနှောက်ဖျက်ဆီးခဲ့သည်။
အဆိုပါ စစ်ကြောင်းသည် ညနေ ၅နာရီခွဲခန့်တွင် ရွှေယင်းမာကျေးရွာကို မီးရှို့ဖျက်ဆီးခဲ့ရာ နေအိမ် ၆လုံးမီးလောင်ပျက်စီးခဲ့ကြောင်း ဒေသခံများက ပြောသည်။
ယမန်နေ့ညက ထိုစစ်ကြောင်းသည် တောချောင်းဦးရွာ၌ ညအိပ်ခဲ့ပြီး ယနေ့ (နိုဝင်ဘာ၄ ရက်)နံနက်တွင် တောချောင်းဦးနှင့် ဂရုကျေးရွာကြားတောထဲ၌ ရောက်ရှိနေကြောင်း ဒေသခံများက ပြောသည်။
Public Service Announcement
ယမန်နေ့ (နိုဝင်ဘာလ ၃ ရက်) ညနေ၅နာရီ၃၀မိနစ်ခန့်က မုံရွာမြို့(နမခ)မှ ထွက်လာသောစစ်ကောင်စီတပ်များသည် နဂါးတွင်းကျေးရွာသို့ စစ်ကြောင်းထိုးဝင်ရောက်ပြီး ကျေးရွာတွင်းရှိ နေအိမ်များကို မီးရှို့ဖျက်ဆီးခဲ့ကြောင်း၊ ရွာသူရွာသားများထွက်ပြေးတိမ်းရှောင်ခဲ့ရသဖြင့် မီးသင့်အိမ်ခြေအရေအတွက် မသိရသေးကြောင်း ဒေသခံများက ပြောသည်။
“ညပိုင်းထိကို မီးကလောင်နေတုန်းပဲ။ တော်တော် များတယ်ထင်တယ်။”ဟု မုံရွာနယ်ခံတစ်ဦးက ပြောသည်။
စစ်ကိုင်းတိုင်းတွင် အာဏာသိမ်းကာလအတွင်း သြဂုတ်လအထိ စစ်ကောင်စီတပ်၏ မီးရှို့ဖျက်ဆီးမှုများကြောင့် နေအိမ်အလုံးပေါင်း ၂၀၁၅၃ လုံး မီးလောင်ပျက်စီးခဲ့ကြောင်း Data For Myanmar ကထုတ်ပြန်ထားသည်။
