စစ်ကောင်စီကျင်းပဖို့ပြင်ဆင်နေတဲ့ အမည်ခံရွေးကောက်ပွဲကို နိုင်ငံတကာအသိုင်းအဝိုင်းအနေနဲ့ ငြင်းပယ်ကြဖို့ ဒီနေ့မှာကျရောက်တဲ့ ၂၀၂၀ အထွေထွေရွေးကောက်ပွဲ ၂ နှစ်ပြည့်နေ့မှာ အမေရိကန် အစိုးရက တိုက်တွန်းလိုက်ပါတယ်။
စစ်ကောင်စီဟာ ဟန်ပြရွေးကောက်ပွဲ တစ်ရပ် စီစဉ်နေပြီး အဲဒီရွေးကောက်ပွဲဟာ လက်ရှိ အနေအထားအရ လွတ်လပ်ပြီးတရားမျှတမှုရှိဖို့မဖြစ်နိုင်ဘူးလို့အမေရိကန် နိုင်ငံခြားရေးဝန်ကြီး အန်တိုနီဘလင်ကန်ကပြောပါတယ်။
ဒါအပြင် အကြမ်းဖက်မှုတွေ ပိုဖြစ်ပွားလာဖို့တွန်းအားဖြစ်လာမှာဖြစ်ပြီး ၊အကြပ်အတည်းကို ပိုမိုကြာစေမှာဖြစ်သလို တိုင်းပြည်ရဲ့ ဒီမိုကရေစီအသွင်ကူပြောင်းမှုနဲ့ တည်ငြိမ်အေးချမ်းသာယာရေးကို နှောင့်နှေးကြန့်ကြာစေလိမ့်မယ်လို့ ကန်နိုင်ငံခြားရေးဝန်ကြီး ဆိုပါတယ်။
ဒါကြောင့်စစ်အာဏာရှင်အဖွဲ့အစည်းနဲ့ သူတို့ရဲ့အမည်ခံရွေးကောက်ပွဲကို ငြင်းပယ်ကြဖို့ နိုင်ငံတကာအသိုင်းအဝိုင်းကိုအမေရိကန်အစိုးရက တိုက်တွန်းပါတယ်။
Public Service Announcement
စစ်ကောင်စီနဲ့ အမည်ခံရွေးကောက်ပွဲကို ငြင်းပယ်ပြီးနောက် ဒီမိုကရေစီလိုလားသူခေါင်းဆောင်တွေနဲ့သာ ထိတွေ့ဆက်ဆံဖို့ကိုလည်း တပါတည်းတိုက်တွန်းထားတာတွေ့ရပါတယ်။
၂၀၂၀ ခုနှစ် နိုဝင်ဘာလ ၈ ရက်မှာကျင်းပခဲ့တဲ့ အထွေထွေရွေးကောက်ပွဲမှာ လူထုဟာ သူတို့ရဲ့ ဒီမိုကရေစီသံန္နိဋ္ဌာန်ကို ထပ်လောင်းအတည်ပြုခဲ့တယ်လို့အမေရိကန်အစိုးရက ဆိုပါတယ်။
ဒါပေမယ့် စစ်တပ်ရဲ့အာဏာသိမ်းမှုဟာ မြန်မာနိုင်ငံရဲ့ ဆယ်စုနှစ် တစ်ခုဟာ ဒီမိုကရေစီတိုးတက်ပြောင်းလဲမှုကို နောက်ပြန်လှည့်စေခဲ့ပါတယ်။
ဓာတ်ပုံ− AFP
