TNLAနှင့် တိုက်ပွဲအတွင်းသေဆုံးခဲ့သည့် စစ်ကောင်စီတပ်ဖွဲ့ဝင်များ၏ ရုပ်အလောင်းနှင့် လက်နက်များရရှိမှု ဓာတ်ပုံထွက်ပေါ်လာ

တအာင်းတပ်မတော်(TNLA)နှင့် တိုက်ပွဲအတွင်း စစ်ကောင်စီတပ်မှ သေဆုံးခဲ့သည့် ရုပ်အလောင်းဓာတ်ပုံကို ရှမ်းသတင်းဌာန Shan Newsက ယနေ့ ဖော်ပြသည်။

ဓာတ်ပုံတွင် လေကြောင်းတိုက်ခိုက်ခံရမှုကြောင့် ပျက်စီးသွားသည့် နမ့်ဆန်မြို့နယ် ကုန်းသာကျေးရွာ ဘုန်းကြီးကျောင်းဝင်းအတွင်း စစ်ကောင်စီတပ်သား ရုပ်အလောင်း ၉လောင်း တန်းစီချထားသည့်အနီးတွင် TNLA တပ်ဖွဲ့ဝင်များက ရရှိသည့် လက်နက်ခဲယမ်းများ တန်းစီချနေသည်ကို တွေ့ရသည်။

အဆိုပါ ကုန်းသာရွာနှင့်အနီးတဝိုက်တွင် ဒီဇင်ဘာ ၇ရက်မှစ၍ ၅ရက်ဆက်တိုက် ဖြစ်ပွားခဲ့သည့် တိုက်ပွဲ၌ စစ်ကောင်စီတပ်မှ ၄၇ဦး သေဆုံးခဲ့ပြီး စစ်ကောင်စီတပ်သား ၂၄ဦးအရှင်ဖမ်းမိသည်ဟုလည်း TNLA နှင့် နီးစပ်သူကိုကိုးကားပြီး Shan News က ဖော်ပြသည်။

TNLA သတင်းနှင့် ပြန်ကြားရေးဌာနမှူး ဒုဗိုလ်မှူးကြီး တားအိုက်ကျော်က တိုက်ပွဲ၌ နှစ်ဖက်ကျဆုံးထိခိုက်မှုရှိသည်ဟုသာ ဖြေကြားပြီး အသေးစိတ် အရေအတွက် သတင်းမရသေးဟု ပြောသည်။

Public Service Announcement

တိုက်ပွဲသည် ဒီဇင်ဘာ ၇ရက်မှ ၁၁ရက်ညပိုင်းအထိ နေ့ညဆက်တိုက်ဖြစ်ပွားခဲ့ကြောင်း TNLA က အသိပေးထားပြီး စစ်ကောင်စီတပ်မှ လေကြောင်းနှင့် လက်နက်ကြီး တိုက်ခိုက်မှုကြောင့် ကုန်းသာရွာ ဘုန်းကြီးကျောင်းအပါအဝင် ကျေးရွာလုံးကျွတ် ထိခိုက်ပျက်စီးခဲ့ကြောင်း ထုတ်ပြန်ထားသည်။

ယမန်နေ့ (ဒီဇင်ဘာ ၁၂ရက်)နှင့် ယနေ့တွင် မြေပြင်တိုက်ပွဲ မရှိသော်လည်း စစ်ကောင်စီတပ်က လေကြောင်းမှ ပစ်မှတ်ရှာခြင်း၊ လေကြောင်းမှ ဗုံးကြဲတိုက်ခိုက်ခြင်းရှိသည်ဟု ဒုဗိုလ်မှူးကြီး တားအိုက်ကျော်က ယနေ့ညပိုင်း၌ ပြောသည်။

“ဒီနေ့ကတော့ တိုက်ပွဲဖြစ်ပွားမှုတော့ မရှိဘူး။ မိုးမိတ်ဘက်က ရေပုံးဘက်မှာ ရဟတ်ယာဉ်တွေဝဲတာတွေ လေကြောင်းကနေ ပစ်ခတ်တာတွေရှိတယ်။ တိုက်ပွဲဖြစ်တဲ့နေရာမှာတော့ အကုန်လုံးငြိမ်နေတယ်”ဟု ဒုဗိုလ်မှူးကြီးတားအိုက်ကျော်က ပြောသည်။