အိုးဘိုထောင်ထဲမှာ အကျဉ်းကျခံနေရတဲ့ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ဟာ ကျန်းမာရေးမကောင်းလို့ လက်ရှိဒီဇင်ဘာလ လဆန်းပိုင်း အတွင်း ဆေးရုံ တက်ရောက်ခဲ့ကြတယ်လို့ နီးစပ်တဲ့အသိုင်းအဝိုင်းကတဆင့်သိရပါတယ်။
ဒေါက်တာဇော်မြင့်မောင်ဟာ ထောင်တွင်းကနေ မန္တလေးဆေးရုံကြီးကို တက်ရောက်ခဲ့ရတာဖြစ်ပြီး ဆေးစစ်တာတွေကို တစ်ရက်တည်းပြုလုပ်ခဲ့ရတယ်လို့ နီးစပ်သူတစ်ဦးကပြောပြပါတယ်။
ကနဦးက အရိုးကင်ဆာသံသယရှိလို့ စစ်ဆေးရာမှာ အရိုးကင်ဆာမရှိကြောင်း အဖြေထွက်ခဲ့တယ်လို့လည်း အဲဒီနီးစပ်သူက ပြောပြပါတယ်။ ဆေးစစ်ပြီးနောက် ဒေါက်တာ ဇော်မြင့်မောင်ကို အိုးဘိုထောင်ထဲ ချက်ချင်းပြန်ပို့လိုက်တယ်လို့လည်းသိရပါတယ်။
အသက် ၇၀ အရွယ် ဒေါက်တာဇော်မြင့်မောင်ဟာ သွေးကင်ဆာ ဝေဒနာသည်ဖြစ်လို့ ဆေးဝါးအမြဲမပြတ် သောက်နေရသူပါ။
ဒီလိုဆေးဝါးတွေကို စစ်ကောင်စီဘက်ကမဖြတ်ပေမယ့် ပါဆယ်ပို့ခွင့်ရတဲ့ ပမာဏကိုတော့ လက်ရှိ ဒီဇင်ဘာလ လဆန်းပိုင်းမှာ ကန့်သတ်ထားတယ်လို့သိရပါတယ်။
