'/%3E%3C/svg%3E){kind=small}
ရှမ်းပြည်နယ် မြောက်ပိုင်း ၊နမ့်ဆန်မြို့နယ် ၊ ကုန်းသာရွာ တဝိုက်မှာ စစ်ကောင်စီတပ်နဲ့ TNLA တို့ကြားဖြစ်ပွားတဲ့တိုက်ပွဲတွေကြောင့် ဘေးလွတ်ရာကိုတိမ်းရှောင်နေရသူ စစ်ဘေးရှောင် ၁,၀၀၀ ဝန်းကျင်ဟာ နေရပ်မပြန်နိုင်သေးကြောင်း ကူညီကယ်ဆယ်ရေးလုပ်ဆောင်နေသူတွေက ပြောပါတယ်။
တိုက်ပွဲဟာ ဒီဇင်ဘာ ၇ ရက်ကစတင်ပြီး တစ်ပတ်ကြာ ဖြစ်ပွားခဲ့တာကြောင့် ကုန်းသာ၊မန်လုံး၊ ဟူးမန်း၊ဆာမ်ငမ်၊ပန်းအလောက်နဲ့ ပိန်းလုံးရွာခံတွေဟာ နမ့်ဆန်မြို့ပေါ်ကိုလာရောက်တိမ်းရှောင်ခဲ့ကြရပါတယ်။
လက်ရှိမှာတော့ တိုက်ပွဲပြီးသွားလို့ အချို့လည်းနေရပ်ပြန်နေကြပါတယ်။
တိုက်ပွဲအဓိက ဖြစ်ပွားတဲ့ ကုန်းသာရွာကတော့ ပြန်လည်ထူထောင်ရေးလုပ်ဖို့လိုတယ်လို့ ကုန်းသာရွာဒေသခံတွေကပြောပါတယ်။
Public Service Announcement
“အကုန်လုံးနီးပါးပျက်စီးသွားတယ်၊ လက်နက်ကြီးတွေထိပြီး လုံးဝနေလို့မဖြစ်တော့တာ” လို့ ကုန်းသာရွာသားတစ်ဦးကပြောပါတယ်။
ကုန်းသာရွာမှာ လူနေအိမ် ၉လုံးမီးလောင်ပြာကျပြီး၊ နေအိမ်၄၀ကျော် လက်နက်ကြီးထိမှန်ပျက်စီးသွားတယ်လို့ ဆိုပါတယ်။
ဟူးမန်းရွာကတော့ နယ်မြေလုံခြုံရေးအခြေအနေနဲ့ သွားလာရေးအခက်အခဲကြောင့် နေရပ်မပြန်နိုင်ကြသေးဘူးလို့သိရပါတယ်။
နေရပ်မပြန်နိုင်သေးတဲ့စစ်ရှောင်တွေအတွက် လာရောက်ကူညီသူတွေရှိသလို အချို့မှာလည်း လိုအပ်ချက်ရှိနေသေးတယ်လို့ သိရပါတယ်။
ဒီနေ့ ဒီဇင်ဘာလ ၁၉ရက်အထိ နမ့်ဆန်မြို့ပေါ် ဇယန်းကြီးကျောင်း၊ မန်လုံနဲ့ မန်ဖတ်တို့မှာ စစ်ရှောင် ၁,၀၀၀ကျော် ရှိနေသေးပါတယ်။
