စစ်အာဏာရှင် စနစ်ချုပ်ငြိမ်းရေးနှင့် ဖက်ဒရယ်ဒီမိုကရေစီပြည်ထောင်စုတည်ဆောက်သွားရန် နိုင်ငံရေးအင်အားစုအသီးသီးနှင့် တန်းတူညီမျှလက်တွဲဆောင်ရွက်နေကြောင်း အမျိုးသားဒီမိုကရေစီအဖွဲ့ချုပ် NLD ဗဟိုကော်မတီက ထုတ်ပြန်သည်။
အမျိုးသားဒီမိုကရေစီအဖွဲ့ချုပ်မှ ပြည်သူလူထုထံ ပေးပို့သော ၂၀၂၃ နှစ်သစ်ကူးသဝဏ်လွှာတွင် ဖော်ပြထားခြင်းဖြစ်ပြီး တိုင်းရင်းသားပြည်သူလူထုတစ်ရပ်လုံး၏ ရည်မှန်းချက်ပြည့်ဝစေရန် ဆောင်ရွက်နေကြောင်း သတင်းစကားပါးသည်။
ယနေ့အချိန်အခါသည် ပြည်သူလူထုတစ်ရပ်လုံး စိန်ခေါ်မှုပေါင်းများစွာရင်ဆိုင်နေရပြီး အနာဂတ်တွင် မျှော်လင့်ချက်ပေါင်းများစွာရရှိစေရေးအတွက် စုပေါင်းအင်အားဖြင့် စစ်အာဏာရှင် စနစ်ဆိုးကို တွန်းလှန်နေရသော အချိန်အခါလည်းဖြစ်ကြောင်း ဖော်ပြသည်။
NLD သည် ပါတီစတင်တည်ထောင်ချိန် ၁၉၈၈ မှစ၍ တိုင်းရင်းသား ပြည်သူလူထုတစ်ရပ်လုံး မျှော်မှန်းထားရှိခဲ့သည့် ဒီမိုကရေစီရေး၊ လူ့အခွင့်အရေး၊ ဖက်ဒရယ် ပြည်ထောင်စုတည်ဆောက်နိုင်ရေးတို့အတွက် ကြိုးပမ်းဆောင်ရွက်ရာတွင် ကြုံလာသမျှ အခက်အခဲ ဘေးအန္တရာယ်မှန်သမျှတို့ကို မတွန့်မဆုတ် ကြံ့ကြံ့ခံရင်ဆိုင်ကျော်ဖြတ်ခဲ့ကြောင်း ဖော်ပြသည်။
ယခင်ထက်ပိုမိုဆိုးရွားစွာ ရင်ဆိုင်နေရသော ယနေ့ကာလတွင်လည်း NLD သည် ချမှတ်ထားပြီးသောမူဝါဒများ၊ လက်တွေ့ကျသောလုပ်ငန်းစဉ်များကို ပါတီဝင် အသီးသီးက ရောက်ရှိရာနေရာတွင် ကျရာတာဝန်များကို ဦးလည်မသုဉ် ထမ်းရွက်နေကြောင်း အသိပေးသည်။