မလေးရှား ဝန်ကြီးချုပ် ဒါတို ဆာရီ အန်ဝါ အီဘရာဟင်ရဲ့ မိန့်ခွန်းမှာ မြန်မာနိုင်ငံနဲ့ ပတ်သက်လို့ ကောက်နုတ် ဖော်ပြထားတဲ့ သဘောထား အချက်အလက်တွေကို ထောက်ခံ ကြိုဆိုကြောင်း အမျိုးသား ညီညွတ်ရေး အစိုးရ (NUG)က ကြေညာခဲ့ပါတယ်။
ဖေဖော်ဝါရီ ၁၀ ရက်မှာ ဝန်ကြီးချုပ် အန်ဝါက အာဆီယံရဲ့ အနာဂတ်နဲ့ ပတ်သက်လို့ ပြောကြားခဲ့တဲ့မိန့်ခွန်းမှာ မြန်မာနိုင်ငံနဲ့ ပတ်သက်လို့ ထည့်သွင်းပြီး သဘောထား မှတ်ချက် ပေးသွားခဲ့ပါတယ်။ အန်ဝါက မြန်မာ့အာဏာသိမ်းစစ်ခေါင်းဆောင်တွေကို အားကောင်းတဲ့ သတင်းစကားတစ်ခု ပေးပို့ဖို့အတွက် အားကောင်းတဲ့ ညီညွတ်မှုမျိုး ရှိစေလိုကြောင်း သူ့ရဲ့ မိန့်ခွန်းထဲမှာ တောင်းဆိုခဲ့ပါတယ်။
ဒါမှသာ မြန်မာ စစ်ခေါင်းဆောင်တွေက မြန်မာပြည်သူတွေအပေါ် ခွဲခြားဆက်ဆံမှု၊ ဖိနှိပ်မှု၊ ဖယ်ကြဉ်မှုနဲ့ အကြမ်းဖက်မှုတွေ ကျူးလွန်နေတာကို ရပ်တန့်နိုင်လိမ့်မယ်လို့လည်း အန်ဝါက ပြောကြားခဲ့ပါတယ်။ ဒါ့အပြင် စစ်ခေါင်းဆောင်တွေက ပြည်သူတွေအပေါ် ရက်ရက်စက်စက် ကျူးလွန်နေတာတွေကို ရပ်တန့်နိုင်ဖို့ အာစီယံမှာ လုပ်ထုံးလုပ်နည်း အသစ်တွေ ပေါ်ထွန်းလာရေး အတွက်လည်း ဝန်ကြီးချုပ် အန်ဝါက ဖိအားပေးခဲ့ပါတယ်။
ဒီလုပ်ငန်းစဉ်ဟာ NUG၊ တိုင်းရင်းသား အဖွဲ့အစည်းတွေ၊မြန်မာ့ အရပ်ဖက် အဖွဲ့အစည်းတွေနဲ့ တိုက်ရိုက် ထိတွေ့မယ့် အခြေအနေဆီ ဦးတည်ရမှာ ဖြစ်သလို စစ်အာဏာရှင်တွေကိုလည်း အာဆီယံရဲ့ အစည်းအဝေးနဲ့ ဖိုရမ်တွေမှာ သူတို့ရဲ့ ကိုယ်စားလှယ် တက်ရောက်ခွင့်ကို တားမြစ် ပိတ်ပင်ထားတာမျိုး အပါအဝင် ဖိအားတွေ ဆက်ပေးနေရမယ်လို့ NUGရဲ့ သဘောထား ထုတ်ပြန်ချက်မှာ ဖော်ပြထားပါတယ်။
Public Service Announcement
ဒါ့အပြင်ဟာ NUGဟာ အာဆီယံနဲ့ ပူးပေါင်း ဆောင်ရွက်မှုတွေကို ရှေ့ဆက် လုပ်ဆောင်သွားမှာဖြစ်ပြီး အင်ဒိုနီးရှားရဲ့ အာဆီယံ အလှည့်ကျ သဘာပတိ တာဝန်ယူမှုကို အပြည့်အဝ ထောက်ခံ အားပေးတယ်လို့လည်း ဆိုပါတယ်။ နောက်ပြီး မလေးရှား ဝန်ကြီးချုပ် အန်ဝါ၊ နိုင်ငံခြားရေး ဝန်ကြီး ဆာရီ ဒါရာဂျာ ဒေါက်တာ ဇမ်ဘရီ အက်ဘ်ဒ် ကာဒါးတို့ကိုလည်း မြန်မာပြည်သူတွေနဲ့အတူ ရပ်တည်ပေးတဲ့အတွက် NUGက အထူးတလည် ကျေးဇူးတင်ကြောင်း ဖေဖော်ဝါရီ ၁၅ ရက် ရက်စွဲနဲ့ ထုတ်ပြန်ချက်မှာ ရေးသားထားခဲ့ပါတယ်။
