ရှမ်းပြည်နယ်မြောက်ပိုင်းရှိ မြို့နယ် လေးခုကို တအာင်းတပ်မတော် (PSLF/TNLA) ဒုဥက္ကဋ္ဌ ဗိုလ်ချုပ်တားဂျုတ်ဂျား ဦးဆောင်သည့် ထိပ်ပိုင်း ခေါင်းဆောင်များ သွားရောက်ပြီး ဒေသခံများနှင့် တွေ့ဆုံခဲ့ကြောင်း TNLAက သတင်းထုတ်ပြန်သည်။
TNLA တပ်မဟာ (၁)၊ (၃)၊ (၅) စစ်ဒေသတွေဖြစ်တဲ့ နမ့်ခမ်းမြို့နယ်၊ မူဆယ်မြို့နယ်၊ ကွတ်ခိုင်မြို့နယ်နဲ့ မန်တုံမြို့နယ်က ဒေသခံပြည်သူလူထုများကို ဖေဖော်ဝါရီ ၁၃ရက်ကနေ ၂၀ ရက်အတွင်း တွေ့ဆုံခဲ့ခြင်းဖြစ်ကြောင်း ဖော်ပြထားသည်။
တွေ့ဆုံဆွေးနွေးပွဲကို နေရာ ၆ခု၌ ပြုလုပ်ခဲ့ပြီး ရွာပေါင်း ၁၈၇ ရွာမှ ဒေသခံ ၃၅၀၀ ကျော်တက်ရောက်ခဲ့ကြောင်း၊ တွေ့ဆုံပွဲ၌ တအာင်း(ပလောင်) သမိုင်းကြောင်း၊ နိုင်ငံရေး၊ တအာင်းပြည်နယ်အတွင်း ပညာရေးကျောင်း ဖွင့်လှစ်နိုင်ရေး၊ မြေယာနှင့်သဘာဝပတ်ဝန်ကျင်ထိန်းသိမ်းရေး၊ လက်ဖတ်လုပ်ငန်းဖွံ့ဖြို့တိုးတတ်ရေး၊ တအာင်းပြည်နယ်ရရှိရေး၊ တအာင်းလူမျိုးအချင်းချင်း အတူတကွလက်တွဲသွားရန်၊ PSLF/TNLA ၏ ရည်ရွယ်ချက် များဒေသခံပြည်သူများ သိရှိနားလည်စေရန် စသည်များကို ဆွေးနွေးခဲ့ကြောင်း ထုတ်ပြန်သည်။
တွေ့ဆုံပွဲသို့ PSLF/TNLA ဒုဥက္ကဌ (၁) ဗိုလ်ချုပ် တားဂျုတ်ဂျား၊ အထွေထွေအတွင်းရေမှူး ဗိုလ်မှူးချုပ် တားဘုန်းကျော်၊ အထွေထွေးအုပ်ချုပ်ရေးမှူး ဗိုလ်မှူးကြီး တားဂူ;ဇာရ်၊ ခရိုင်မှူး၊ မြို့နယ်မှူး၊ တိုက်နယ်မှူးနှင့် အရာရှိများ တက်ရောက်ခဲ့သည်ဟု ဆိုသည်။
Public Service Announcement
ထိုဒေသများအတွင်းရှိ ဒေသခံပြည်သူလူထုများနှင့် PSLF/TNLA ထိပ်ပိုင်းခေါင်းဆောင်များ တွေ့ဆုံမှုမှာ ပထမဆုံးအကြိမ်ဖြစ်ကြောင်း TNLA က ထုတ်ပြန်သည်။
TNLA အနေဖြင့် အာဏာသိမ်းပြီးနောက် စစ်ကောင်စီတပ်နှင့် တိုက်ပွဲဖြစ်ပွားမှု လျော့နည်းသွားသော်လည်း ဒီဇင်ဘာလကုန်ပိုင်းက စစ်ကောင်စီတပ်က TNLA တပ်စခန်းများရှိရာသို့ လေကြောင်းမှ ထိုးစစ်ဆင် တိုက်ခိုက်၍ တစ်ပတ် ကြာတိုက်ပွဲပြင်းထန်စွာ ဖြစ်ပွားခဲ့သည်။ ယင်းဖြစ်စဉ် နောက်ပိုင်း၌လည်း စစ်ကောင်စီက ထိုးစစ်ဆင်ခြင်းကြောင့် တိုက်ပွဲ နှစ်ကြိမ်ဖြစ်ခဲ့ကြောင်း၊ တိုက်ပွဲမဖြစ်ဘဲ စစ်ကောင်စီတပ်က လေကြောင်း တိုက်ခိုက်မှု တစ်ကြိမ်ပြုလုပ်ခဲ့ကြောင်း TNLA သတင်းနှင့် ပြန်ကြားရေးဌာန တာဝန်ခံ ဒုဗိုလ်မှူးကြီး တားအိုက်ကျော်က ပြောကြားထားသည်။
