စစ်ကောင်စီက ၎င်းတို့လူကယ်ထုတ်ပြီး PDF များဖမ်းထားသည့် ပြည်သူများအား ကယ်တင်ခဲ့ဟု လိမ်လည်ဝါဒဖြန့်

တနင်္သာရီတိုင်း ပုလောမြို့နယ်တွင် ပြည်သူ့ကာကွယ် ရေးတပ်မတော် PDF များက လမ်းပိုင်းစစ်ဆေးစဥ် ပြစ်ချက်တစ်ခုခုဖြင့် ဖမ်းဆီးထားသော စစ်ကောင်စီထောက်တိုင် ၁၃ဦးမှာ တိုက်ပွဲအတွင်း ပြန်လည်လွတ်မြောက်သွားကြောင်း မြိတ်ခရိုင် တပ်ရင်း (၁)က People’s Spring သို့ ပြောသည်။

၎င်းအခြေအနေကို စစ်ကောင်စီတပ်က PDF များ မတရားဖမ်းဆီးထားသည့် အပြစ်မဲ့ပြည်သူ ၁၃ဦးအား ဖမ်းဆီးချုပ်နှောင်ထားသည့်နေရာမှ ကယ်ထုတ်နိုင်ခဲ့ကြောင်း လိမ်လည်ဝါဒဖြန့်ခဲ့ခြင်းဖြစ်သည်။

ဖြစ်စဥ်မှာ ပုလော-မြိတ်လမ်းပိုင်း ပြည်ထောင်စုလမ်းမကြီးတွင် PDF များက နယ်မြေစိုးမိုးရေးအတွက် လမ်းပိုင်းစစ်ဆေးမှုများလုပ်ဆောင်စဥ် စစ်ဆေးမှုအား အသာတကြည်လက်မခံသည့် စစ်ကောင်စီလက်အောက်ခံ Non-CDM များ၊ စစ်တပ်သတင်းပေးဒလန်များ၊ မူးယစ်ဆေးဝါးသုံးစွဲသူများအပါအဝင် ၁၃ဦးကို ဖမ်းဆီးထိန်းသိမ်းခဲ့ကြောင်း မြိတ်ခရိုင် PDF တပ်ရင်း (၁)က ရှင်းပြသည်။

ထို့နောက် အဆိုပါ ပြစ်ချက်ရှိသူများအား ထိန်းသိမ်းထားရာ ပုလောမြို့နယ် ကဒဲကျေးရွာသို့ စစ်ကောင်စီတပ်က ဖေဖော်ဝါရီ ၁၅ ရက်တွင် စစ်ကြောင်းထိုးလာစဥ် နှစ်ဖက်တိုက်ပွဲဖြစ်ပွားခဲ့ရာ စစ်တပ်က သံဃာနှစ်ပါးအားရိုက်နှက်ဖမ်းဆီးသည့်အပြင် ဘုန်းကြီးကျောင်းတစ်ကျောင်းနှင့် နေအိမ်(၁၀၀) ဝန်းကျင်ခန့်ကို မီးရှို့ဖျက်ဆီးခဲ့သည်ဟု တပ်ရင်း (၁)မှ တာဝန်ရှိသူက ရှင်းပြသည်။

Public Service Announcement

အဆိုပါတိုက်ပွဲအတွင်း ကဒဲကျေးရွာမှ ဒေသခံပြည်သူများ ထွက်ပြေးတိမ်းရှောင်ကြရာ ပြစ်ချက် အမျိုးမျိုးဖြင့် ထိန်းသိမ်းထားသော စစ်ကောင်စီထောက်တိုင်များအား စစ်တပ်ကတွေ့ရှိသွားပြီး ဖမ်းဆီးထားရာမှ ပြန်လွှတ်ပေးခဲ့သည်။

“ပြောမယ်ဆိုရင် အဲဒီ ၁၃ဦးက ထွက်မပြေးဘဲ တစ်နေရာမှာ ပုန်းခိုရင်း ကျန်နေတဲ့သူတွေပေါ့။ အမှန်တော့ ၁၃ဦးမကဘူး။ တချို့ ထွက်ပြေးသွားတာ။ အခု ၁၃ဦးဆိုတာက တစ်နေရာမှာပုန်းခိုနေရင်း စစ်တပ်နဲ့တွေ့သွားတာပေါ့”ဟု မြိတ်ခရိုင် PDF တပ်ရင်း (၁)မှ တာဝန်ရှိသူတစ်ဦးက ပြောသည်။

အထက်ပါ စစ်ကောင်စီထောက်တိုင် ၁၃ဦးကို PDF များ မတရားဖမ်းဆီးထားသည့် ပြည်သူများအား ကယ်ထုတ်နိုင်ခဲ့ကြောင်း စစ်ကောင်စီက ဝါဒဖြန့်သည့် ရုပ်သံဖိုင်တစ်ခုတွင် ၎င်း (၁၃)ဦးအား ပုန်းခိုသည့်နေအိမ်အတွင်းမှ အပြင်သို့ခေါ်ထုတ်စဥ် စစ်ကောင်စီတပ်သားများက သေနတ်များဖြင့်ထိုးချိန်ထားသည်ကို တွေ့ရသည်။