စစ်ကောင်စီတပ် နှစ်ဦးသေ၊ ခြောက်ဦးဒဏ်ရာရဟုဆို
ပဲခူးခရိုင်၊ ဒိုက်ဦးမြို့အခြေစိုက် အကြမ်းဖက်စစ်ကောင်စီ၏ အမှတ်(၄၄၀) ခြေမြန်တပ်ရင်းဂိတ်နှင့် (၇၂)မိုင်ဂိတ်တို့ကို ပဲခူးမြို့နယ် ပြည်သူ့ကာကွယ်ရေးတပ်ဖွဲ့နှင့် Daik-U Defense (DDF)တို့ ပူးပေါင်းပြီး ‘နန်းထိုက်အောင်စစ်ဆင်ရေး’အဖြစ် မိုင်းခွဲတိုက်ခိုက်ခဲ့ကြောင်း ပဲခူးတိုင်းစစ်ဒေသခွဲက ယနေ့(မတ်လ၁ ရက်) ထုတ်ပြန်သည်။
ဒိုက်ဦးမြို့အနီး ခမရ (၄၄၀)တပ်ဂိတ်နှင့် ဒိုက်ဦးမှ အမြန်လမ်းမကြီးသို့သွားရာလမ်းတွင်ရှိသည့် (၇၂)မိုင် စစ်ဆေးရေးဂိတ်များကို ဖေဖော်ဝါရီ ၂၆ ရက် ည ၈နာရီက မိုင်းများဖြင့် ဖောက်ခွဲတိုက်ခိုက်ခဲ့ခြင်းဖြစ်သည်ဟု ဖော်ပြသည်။
“ခလရ (၄၄၀)က မြို့နဲ့သိပ်မဝေးဘူး။ ပြီးတော့ (၇၂)မိုင်ဂိတ်ဆိုတာက အမြန်လမ်းဘက်အတက်နားလေးမှာ ရှိတာ။ အဖွဲ့တွေ မိုင်းခွဲခဲ့တယ်ဆိုတာ မှန်ပါတယ်”ဟု တိုက်ခိုက်မှုတွင်ပါဝင်သည့် တော်လှန်ရေးတပ်ဖွဲ့များနှင့်နီးစပ်သော ဒေသခံတစ်ဦးက People’s Spring သို့ ပြောသည်။
အဆိုပါတိုက်ခိုက်မှုများတွင် ခမရ(၄၄၀)ဂိတ်မှ စစ်ကောင်စီတပ်သာငါးဦး ဒဏ်ရရှိခဲ့ပြီး တိုက်ခိုက်ခံရပြီးနောက် အကြမ်းဖက်စစ်ကောင်စီတပ်များက သေနတ်ဖြင့် ရမ်းသမ်းပစ်ခတ်မှုများ ပြုလုပ်ခဲ့သည်ဟု ဆိုသည်။
Public Service Announcement
ထို့အပြင် (၇၂)မိုင်ရှိ စစ်တပ်စစ်ဆေးရေးဂိတ်အား တိုက်ခိုက်စဥ် အကြမ်းဖက်စစ်ကောင်စီတပ်ဖွဲ့ဝင် နှစ်ဦးသေဆုံးပြီး တစ်ဦးဒဏ်ရာအပြင်းအထန်ရရှိသွားကြောင်း ပဲခူးတိုင်းစစ်ဒေသခွဲက အသိပေးသည်။
“ကတေလေးတွေ safe zone ရောက်ပြီး တစ်ဘက်က ထိခိုက်သတင်းစောင့်ပြီးမှ သတင်းထုတ်တာဖြစ်ပါတယ်”ဟု အထက်ပါ တိုက်ခိုက်မှုနှင့်စပ်လျဥ်းပြီး သတင်းထုတ်ပြန်မှု နောက်ကျသည့်အပေါ် ပဲခူး(ပကဖ)နှင့်နီးစပ်သူတစ်ဦးက ပြောသည်။
အထက်ပါတိုက်ခိုက်မှုများတွင် စစ်ကောင်စီတပ်မှ ပြန်လည်ပစ်ခတ်မှုများရှိခဲ့သော်လည်း တော်လှန်ရေးရဲဘော်များ အထိအခိုက်မရှိ အောင်မြင်စွာဆုတ်ခွာနိုင်ခဲ့ကြောင်းလည်း အသိပေးထားသည်။
