စစ်ကိုင်းတိုင်း၊ ရွှေဘိုမြို့ထောက်ပို့တပ်မှ စစ်ကောင်စီတပ်အား မိုင်းဆွဲပြီး ဒရုန်းဖြင့်ပါ ဗုံးချတိုက်ခိုက်ရာ စစ်ကောင်စီတပ်သားတစ်ဦးသေဆုံးကြောင်း ဒေသတွင်းတော်လှန်ရေးအင်အားစုများက ပြောသည်။
ယမန်နေ့ (မတ်လ ၁၆ ရက်)က နံနက် ၈နာရီခွဲ ခန့်က ရွှေဘိုမြို့ ထောက်ပို့တပ်မှ ကားအကြီး တစ်စီးဖြင့်လာချသွားသော အင်အား ၃၀ခန့်ပါ စစ်ကောင်စီတပ်အား တအုံကျေးရွာ အရှေ့ဘက် အရောက်တွင် မိုင်းဆွဲတိုက်ခိုက်ခဲ့ကြောင်း Who am i-Army အဖွဲ့က ပြောသည်။
ထိုသို့မိုင်းဆွဲတိုက်ခိုက်မှုကြောင့် စစ်ကောင်စီတပ်မှာ ရှေ့ဆက်မတက်ဘဲ နောက်သို့ခြေလျင်ပြန်ခေါက်သွားခဲ့ကြောင်း Who am i-Army အဖွဲ့က ဆိုသည်။
အဆိုပါစစ်ကြောင်းအား ရွှေဘိုမြို့အဝင်အနီး၌ ဒရုန်းဖြင့် ဗုံးသီးချထပ်မံတိုက်ခိုက်ခဲ့ရာ စစ်ကောင်စီတပ်ဖွဲ့ဝင် တစ်ဦးသေဆုံးကာ နှစ်ဦးထိခိုက်ဒဏ်ရာရရှိခဲ့ကြောင်း Black Wolf-Army အဖွဲ့၏ သတင်းနှင့် ပြန်ကြားရေးတာဝန်ခံက ပြောသည်။
Public Service Announcement
“နေ့လယ် ၁ နာရီလောက်မှာ တအုံကျေးရွာ အရှေ့ဘက် ကျွန်းတောကနေ ကင်းပုန်းဝပ်ပြီး ပြန်လာတဲ့ စစ်ကောင်စီတပ်သားတွေကို ဗုံးသီးနှစ်လုံးချပြီး တိုက်ခိုက်ခဲ့တာပါ။”ဟု အထက်ပါ တာဝန်ခံက ဆိုသည်။
အဆိုပါ စစ်ဆင်ရေးကို Who am i-Army နှင့် Black Wolf-Armyတို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
