▪︎ကယ်ဆယ်ပေးခဲ့သူများတွင်သက်ကြီးရွယ်အို၊ မကျန်းမာသူနှင့် စိတ်အခြေအနေအဆင်မပြေသူများပါဝင်
ရှမ်းပြည်နယ် ပင်လောင်းမြို့နယ် တောင်စလုံးရွာသို့စစ်ကောင်စီတပ် စစ်ကြောင်းရောက်ရှိနေစဉ် ရွာထဲ၌ ကျန်နေသည့် ဒေသခံ ပြည်သူ ၁၅ဦးကို ကူညီကယ်ဆယ်ရေးဆောင်ရွက်ခဲ့ကြောင်း အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက ထုတ်ပြန်သည်။
မတ်လ ( ၈ )ရက်နေ့ မနက် ၈ နာရီခန့်တွင် တောင်စလုံးရွာ ဘုန်းကြီးကျောင်းနှင့် ရွာထိပ်စေတီသို့ အကြမ်းဖက်စစ်ကောင်စီတပ် ရောက်ရှိနေကြောင်း ကင်းထောက်မှတဆင့် သိရှိရပြီး ကျေးရွာအတွင်းရှိ ကျန်ရှိနေသည့်ဒေသခံများအား ကူညီကယ်ဆယ်ရေးကို ပအိုဝ်းအမျိုးသားကာကွယ်ရေးတပ်ဖွဲ့(PNDF)၊ ကရင်နီအမျိုးသားများကာကွယ်ရေးတပ် (KNDF)၊ နေပြည်တော် ပြည်သူ့ကာကွယ်ရေးတပ်ဖွဲ့ (NPT PDF)၊ (၁၀၀၃) တပ်ရင်းတို့ ပူးပေါင်းလုပ်ဆောင်ခဲ့ခြင်းဖြစ်သည်ဟုဆိုသည်။
ကယ်ဆယ်ရေးလုပ်ငန်းများ ဆောက်ရွက်နေစဉ်အတွင်းဒေသခံစစ်ရှောင်ပအိုဝ်းတိုင်းရင်းသားတစ်ဦးကိုတွေ့ရှိရာ၎င်းအား PNDF မှ မေးမြန်းစုံစမ်းချက်အရ ရွာထဲရှိ အိမ်အချို့၌ လည်း သက်ကြီးရွယ်အိုများ၊ မကျန်းမာသူများ၊ စိတ်အခြေနေ အဆင်မပြေသူများ ကျန်ရှိနေသည်ကို သိခဲ့ကြသည်။ထို့နောက် PNDF နှင့်အတူ ကယ်ဆယ်ရေးလုပ်နေသည့် ညီနောင်တပ်ရင်းတပ်ဖွဲ့များမှ ရန်သူရှိရာအနီးတဝိုက်သို့ အရေးပေါ်ကယ်တင်ခြင်းလုပ်ငန်းကို အချိန်နှင့်တပြေးညီ စတင်အကောင်ထည်ဖော် လုပ်ဆောင်နိုင်ခဲ့ကြောင်း ထုတ်ပြန်သည်။
ရန်သူအကြမ်းဖက် စစ်ကောင်စီတပ် ရောက်ရှိရာနေရာနှင့် ကျန်ရှိသောရွာသားများ၏ အိမ်အကွာအဝေးမှာ မီတာ ၁၀၀ မှ ၅၀၀အကွာအဝေးအတွင်းသာ ရှိပြီး PNDF နှင့် ညီနောင်တပ်ရင်းတပ်ဖွဲ့များမှ ရန်သူ့အနီးတဝိုက်သို့ သတိကြီးစွာချဉ်းကပ်ကာ ရွာသား စုစုပေါင်း (၁၅) ဦးအား အန္တရာယ်ကင်းစွာ ကယ်ဆယ်နိုင်ခဲ့ကြောင်း အသိပေးသည်။
Public Service Announcement
ကယ်ဆယ်ရေးလုပ်ငန်းအပြီး သက်ဆိုင်ရာဆေးတပ်ဖွဲ့များနှင့်အတူ ကျန်းမာရေးစောင့်ရှောက်မှု ခံယူပေးနိုင်ခဲ့ပြီး စားနပ်ရိက္ခာများကိုလည်း အနည်းအကျဉ်း ဝေမျှပေးခဲ့သည်။ ကူညီကယ်ဆယ်ခဲ့သော ရွာသူ/သားများ လုံခြုံဘေးကင်း ကျန်းမာလျက်ရှိပြီး တိုက်ပွဲအတွင်းကွဲကွာခဲ့ရသည့် မိသားစုများနှင့်လည်း တစုတစည်းထဲ ပြန်လည်ဆုံစည်းနိုင်ရေး ချိတ်ဆက်ဆောင်ရွက်ပေးခဲ့ကြောင်းလည်းသိရသည်။
ထို့အပြင်KNDF မှ ကူညီကယ်ဆယ်ထားသည့် ပြည်သူတချို့လည်း ရှိပြီး KNDF မှ ကူညီကယ်ဆယ်ထားသူများနှင့် PNDF မှ ကူညီကယ်ဆယ်ထားသည့် ဒေသခံပြည်သူများသည် မတ်လ ၁၉ ရက်နေ့တွင် လုံခြုံသည့်နေရာသို့ တစုတစည်းထဲ ရောက်ရှိနေပြီးဖြစ်ကြောင်း သိရသည်။မတ်လ ၂၂ ရက်နေ့တွင် အဆိုပါဒေသခံများ၏ ပြောဆိုချက်အရ မိသားစုများရှိနေသည့် စစ်ဘေးရှောင်စခန်းသို့ ချိတ်ဆက်ပို့ဆောင်ပြီး ဖြစ်ကြောင်း အသိပေးသည်။
စစ်ရှောင်ပြည်သူ ( ၁၅) ဦးကို PNDF မှ ၁ ဦးလျှင် နှစ်သောင်းကျပ်နှုံး နှင့် လာရောက်သယ်ယူပို့ဆောင်သည့် လူမှုကူညီရေးအတွက် ခရီးစရိတ် သုံးသောင်းကျပ်အား ထောက်ပံ့ကူညီခဲ့ကြောင်း ထုတ်ပြန်သည်။
