▪︎ဝန်ထမ်းအကြီးအကဲ ၂ဦးနှင့်စစ်သား ၁၂ ဦးသေဟုထုတ်ပြန်
မန္တလေးတိုင်းဝန်ကြီးချုပ်လိုက်ပါလာသည့်ယာဥ်တန်းကို အစိုးရအဖွဲ့ရုံးအနီး မန္တလေးမြို့လယ်ခေါင်တွင် ပဒေသာမိုင်းဖြင့် ဖောက်ခွဲတိုက်ခိုက်ခဲ့ကြောင်း ပြည်သူ့ကာကွယ် ရေးတပ်မတော်(မန္တလေး) MPDF က ယနေ့ မတ် ၂၅ ရက်တွင် အသိပေးထုတ်ပြန်သည်။
“ရာဇနိုင်စစ်ဆင်ရေး” ဟုအမည်ပေးထားသောအဆိုပါတိုက်ခိုက်မှုကို ယမန်နေ့ (မတ် ၂၄ ရက်) နံနက် ၁၀ နာရီ မိနစ် ၂၀ အချိန်တွင် MPDF ၏ အထူးစစ်ဆင် ရေးအဖွဲ့များမှ မန္တလေးမြို့အတွင်း ဝင်ရောက်ကာ စစ်ကောင်စီခန့် မန္တလေးတိုင်းဒေသကြီးဝန်ကြီးချုပ် ဦးမျိုးအောင်လိုက်ပါလာသောယာဥ်တန်းအား ဖောက်ခွဲတိုက် ခိုက်ခဲ့ခြင်းဖြစ်သည်ဟု အသိပေးထားသည်။
ယာဉ်တန်းအားတိုက်ခိုက်ချေမှုန်းခဲ့သည့်နေရာသည်မန္တလေးမြို့လယ်ခေါင်၊ တိုင်းဒေသကြီး အစိုးရအဖွဲ့ရုံး အနီးတွင်ဖြစ်ပြီး ပဒေသာမိုင်းဆင်၍ ချေမှုန်းရေးဆောင်ရွက်ခဲ့ခြင်းဖြစ်ကြောင်း ဖော်ပြထားသည်။
ယင်းစစ်ဆင်ရေးကြောင့်စစ်ကာင်စီယာဉ်တန်း၏ကားများတွင် ကြီးမားသောထိခိုက် ပျက်စီးမှုများ ဖြစ်ပေါ်စေခဲ့ပြီး ယာဉ်တန်းတွင် လိုက်ပါလာသော ရန်သူများလည်း သေကြေ ထိခိုက်ဒဏ်ရာရှိမှုများ ရှိခဲ့ပါသည်ဟု ဆိုသည်။
Public Service Announcement
ယခုကြေညာချက်ထုတ်ပြန်ချိန်အထိ ရန်သူဘက်မှ စစ်သားစုစုပေါင်း (၁၂) ဦး ပွဲချင်းပြီး သေဆုံးကာ ရန်သူ၏ အုပ်ချုပ်ရေးယန္တရားမှ ဝန်ထမ်းအကြီးအကဲ နှစ်ဦးလည်း သေဆုံးခဲ့ကြောင်း အတည်ပြုနိုင်ခဲ့ပြီး ဖြစ်သည်ဟု MPDF က ဖော်ပြသည်။
“အဲ့ဒီ စစ်ဆင်ရေးမှာ ကျွန်တော်တို့ဘက်က တစ်စုံတစ်ရာ ထိခိုက်မှု လုံးဝမရှိခဲ့ပါဘူးခင်ဗျာ။ ရဲဘော်တွေ အားလုံးဘေးကင်းပါတယ်”ဟု MPDF မှတာဝန်ရှိသူတစ်ဦးကPeople’s Spring သို့ ပြောသည်။
စစ်ကောင်စီ၏ မန္တလေးတိုင်းဒေသကြီး ဝန်ကြီးချုပ် ဖြစ်သူ မျိုးအောင်၏ နောက်ဆုံးအခြေအနေအားလည်း ပြည်သူ့ကာကွယ်ရေးတပ်မတော် (မန္တလေး)MPDF မှ ထောက်လှမ်းစုံစမ်းနေဆဲဖြစ်ကြောင်း ထုတ်ပြန်ထားသည်။
ပြည်သူ့ကာကွယ်ရေးတပ်မတော်(မန္တလေး)MPDFသည် အမျိုးသားညီညွတ်ရေးအစိုးရ(NUG) ၊ကာကွယ်ရေးဝန်ကြီးဌာနလက်အောက်ရှိ တပ်ဖွဲ့ဖြစ်သည်။
ယခုတိုက်ခိုက်မှုမှာ မန္တလေးမြို့လယ် ၊စစ်ကောင်စီ၏မန္တလေးအစိုးရအဖွဲ့ရုံး ၊ အောင်မြေသာစံအမှတ်(၃)ရဲစခန်း၊ စစ်ကောင်စီတပ်များရှိရာ မန္တလေးနန်းတော် တို့အနီးတွင်ပြုလုပ်သွားခြင်းဖြစ်၍ ပြည်သူများပင် အံသြနေကြကြောင်းဒေသခံအချို့ကပြောသည်။
