လက်နက်ခဲယမ်းများ သိမ်းဆည်းရရှိဟု အသိပေး
လက်နက်ခဲယမ်းများ သိမ်းဆည်းရရှိဟု အသိပေးKNLA ပူးပေါင်းတပ်မှ တစ်ဦးကျဆုံး၊ သုံးဦးဒဏ်ရာရဟု FFDတပ်ဖွဲ့ ထုတ်ပြန်
ကရင်အမျိုးသားအစည်းအရုံး(KNU) ဖာပွန်ခရိုင် တပ်မဟာ(၅)နယ်မြေရှိ စစ်ကောင်စီ၏ မယ်ခါးထာ့ တပ်စခန်းသိမ်းတိုက်ပွဲ၌ လက်နက်ခဲယမ်းများရရှိခဲ့ကြောင်း တိုက်ပွဲတွင် ပါဝင်ခဲ့သည့် Force for Federal Democracy (FFD)က သတင်းထုတ်ပြန်သည်။
အဆိုပါ တပ်စခန်းကို ယနေ့(မတ်လ ၂၇ရက်)နံနက်တွင် တိုက်ခိုက်သိမ်းပိုက်ခဲ့ခြင်းဖြစ်သည်။ စစ်ကောင်စီခေါင်းဆောင်မင်းအောင်လှိုင်က PDFနှင့် တိုင်းရင်းသားတော်လှန်ရေးအဖွဲ့တို့အား အမြစ်ပြတ်ချေမှုန်းမည်ဟု ပြောဆိုခဲ့ပြီး နောက်တစ်ရက်တွင် PDF နှင့် ပူးပေါင်းအဖွဲ့က စစ်ကောင်စီ၏ အရေးပါသည့် တပ်စခန်းတစ်ခုကို တိုက်ခိုက်သိမ်းပိုက်လိုက်ခြင်းဖြစ်သည်။
“သက်တမ်းအရှည်ဆုံး စခန်းတစ်ခုဖြစ်တဲ့ မယ်ခါးထာ့ စစ်ကောင်စီတပ်စခန်းကို KNLAတပ်ဖွဲ့ရဲ့ ဦးဆောင်မှုနဲ့ အတူ တိုက်ခိုက်သိမ်းပိုက်”ဟု တောင်ပိုင်းစစ်ဒေသ၌ စစ်ရေးလှုပ်ရှားမှုများလုပ်ဆောင်လျက်ရှိသည့် FFDက ထုတ်ပြန်သည်။
စစ်ကောင်စီဘက်က လက်နက်ကြီး ၊လက်နက်ငယ် နှင့် စက်လက်များဖြင့် ဆက်တိုက်ပစ်ခတ်ခဲ့၍ တိုက်ပွဲပြင်းထန်ခဲ့ကြောင်း၊ ထိတွေ့မှု တစ်နာရီခန့်အကြာတွင် မယ်ခါးထာ့ စစ်ကောင်စီစခန်းကို KNLA မဟာမိတ် ပူးပေါင်းတပ်ဖွဲ့မှ တိုက်ခိုက်သိမ်းပိုက် မီးရှို့ဖျက်ဆီးခဲ့ကြောင်း အသိပေးထားသည်။
Public Service Announcement
စခန်းသိမ်းဖြစ်စဉ်တွင် လက်နက်ခဲယမ်းများ သိမ်းဆည်းရရှိခဲ့ပြီး စစ်ကောင်စီတပ်ဘက်က ထိခိုက်သေဆုံးမှုကို အတိအကျ မသိရသေးဟု ထုတ်ပြန်သည်။ ပူးပေါင်းတပ်ဖွဲ့မှ တစ်ဦး ကျဆုံးပြီး သုံးဦးဒဏ်ရာရရှိခဲ့သည်ဟု ဖော်ပြသည်။
မယ်ခါးထာ့စခန်းကို သိမ်းပိုက်နိုင်ခဲ့ကြောင်း KNU တပ်မဟာ(၅) ပြောရေးဆိုခွင့်ရှိသူ ပဒိုမန်းမန်းက People’s Spring သို့ အတည်ပြုပြောကြားထားသည်။ စစ်ကောင်စီတပ်မှ သေဆုံးထိခိုက်နှင့် လက်နက်ခဲယမ်း သိမ်းဆည်းရရှိမှု အခြေအနေ များနှင့်ပတ်သက်ပြီး KNU တာဝန်ရှိသူများထံ ဆက်သွယ်စုံစမ်းနေဆဲဖြစ်သည်။
