မုန်တိုင်းကြောင့် ထိခိုက်ပျက်စီးများခဲ့သည့် မတူပီတွင် အမိုးအကာများအရေးပေါ်လိုအပ်နေ

မိုခါမုန်တိုင်းကြောင့် မတူပီ ချင်းကာကွယ်ရေးတပ်ဖွဲ့(CDF) ထိန်းချုပ်နယ်မြေအတွင်း ထိခိုက်ပျက် စီးမှုများပြားခဲ့ပြီး အမိုးအကာများ အရေးပေါ် လိုအပ်လျက်ရှိကြောင်း မတူပီ CDF ပြောရေးဆိုခွင့်ရှိသူက ပြောသည်။

မေလ ၁၄ရက်က မုန်တိုင်းတိုက်ခိုက်ခဲ့၍ မတူပီ CDFထိန်းချုပ်နယ်မြေရှိ ကျေးရွာများမှ ပြည်သူလူထုနေအိမ် ၂၃၀နီးပါး ပျက်စီးခဲ့ကြောင်း၊ ဆက်သွယ်ရေးအခက်အခဲကြောင့် ထိခိုက်ပျက် စီးမှု ထိုထက်ပိုများနိုင်ကြောင်း ၎င်းက ဆိုသည်။

“အဓိက အခက်အခဲက ကျနော်တို့မှာ အမိုးအကာတွေအကုန်လုံးလိုအပ်တယ်။ အများအားဖြင့် အမိုးလန်တာတွေအများအားဖြင့်ရှိတယ် ။အိမ်ပြိုပျက်တာနည်းတယ်။ ကျနော်တို့ အခုအချိန်မှာ ပိုက်ဆံဘယ်လောက်ရှိရှိ သွပ်မိုးတွေဆိုရင် ဝယ်လို့ခက်တယ်။ အလွယ်ဆုံးက မိုးကာလောက်ရနိုင်ရင် ကျနော်တို့မှာ လုံး၀ အဆင်ပြေတဲ့ အခြေအနေတော့ရှိတယ်။ ကျနော်တို့ တပ်ရင်းစခန်းတွေ လည်း ဒီအတိုင်းပါပဲ အားလုံးအပျက်အစီးတွေရှိတယ်။ အမိုးအကာလောက်ပဲ ရရင် ပြည်သူအတွက်ရော တပ်အတွက်ရော အဆင်ပြေမယ်”ဟု မတူပီ CDF ပြောရေးဆိုခွင့်ရှိသူက ပြောသည်။

အမိုးအကာများ အချိန်မီမရပါက မိုးတွင်းကာလ၌ အခက်အခဲများစွာကြုံရမည်ဟု ၎င်းကဆိုသည်။

Public Service Announcement

ပျက်စီးသွားသည့် လူနေအိမ်များ၊ ဘာသာရေး အဆောက်အုံများ ၊ စာသင်ကျောင်းများ ပြန်လည်ပြုပြင်နိုင်ရန်နှင့် မုန်တိုင်းဒဏ်သင့် ပြည်သူများအတွက် အမိုးအကာပစ္စည်းများ၊ စားနပ်ရိက္ခာနှင့် ဆေးဝါးများအပါအဝင် အခြားအရေးပေါ် အကူအညီများ လိုအပ်လျက်ရှိကြောင်း မတူပီ CDFက ထုတ်ပြန်သည်။

နိုင်ငံတကာအဖွဲ့အစည်းများ၊ အစိုးရမဟုတ်သည့် အဖွဲ့အစည်း (NGO/INGO)နှင့် လူမှုအခြေပြု အဖွဲ့အစည်းများ အနေဖြင့် အကူအညီပေးကြရန်လည်း မတူပီ CDFက မေတ္တာရပ်ခံထားသည်။

ချင်းပြည်နယ်မင်းတပ်တွင်လည်း စပါးကျီ ၁၅၀ အပါအဝင်လူနေအိမ်အဆောက်အဦးများစွာ ပျက်စီးခဲ့၍ စားနပ်ရိက္ခာများ လိုအပ်လျက်ရှိကြောင်း မင်းတပ်ပြည်သူ့အုပ်ချုပ်ရေးအဖွဲ့က ထုတ်ပြန်ထားသည်။